قازاقستاندا مال باسى مەن قۇس سانى تۇراقتى تۇردە ءوسىپ كەلەدى

قازاقستاندا اۋىل شارۋاشىلىعى قارقىن الۋدا.

بۇل تۋرالى اۋىل شارۋاشىلىعى ءمينيسترى ساپارحان وماروۆ حالىققا ەسەپ بەرۋ كەزدەسۋىندە ايتتى، دەپ حابارلادى Almaty-akshamy.kz ق ر اشم سايتىنا سىلتەمەلەپ.

سالا باسشىسىنىڭ ايتۋىنشا، 2020 جىلدىڭ قورىتىندىسى بويىنشا ءىرى قارا سانى 7،8 ملن باسقا جەتكەن. 2019 جىلمەن سالىستىرعاندا، بۇل كورسەتكىش 5،6%-عا ارتىق. قوي مەن ەشكى باسى 4،7%-عا، جىلقى 10،1%-عا، تۇيە 5،2%-عا وسكەن.

سوعان سايكەس، مال شارۋاشىلىعى ونىمدەرىنىڭ ءوندىرىسى دە ارتقان. ەت 4،3%-عا جانە ءسۇت ءوندىرىسى 3،2%-عا وسكەن. 

«وتكەن جىلى مال شارۋاشىلىعى ونىمدەرى يمپورتىن الماستىرۋ اياسىندا ەلىمىزدە 48 ءتاۋارلى-سۇت فەرماسى ىسكە قوسىلدى. بۇل ءسۇت زاۋىتتارىنىڭ جۇكتەمەسىن 77%-عا دەيىن ارتتىرۋعا، ال ءسۇت وڭدەۋ كولەمىن 1،8 ملن تونناعا جەتكىزۋگە مۇمكىندىك بەردى.

سونداي-اق، 3 ەت كومبيناتى ىسكە قوسىلدى. وسىنىڭ ارقاسىندا ەت وڭدەۋ كولەمىن 151-دەن 166 مىڭ تونناعا دەيىن ۇلعايتۋعا مۇمكىندىك تۋدى.

بۇعان قوسىمشا 8 قۇس فابريكاسى ىسكە قوسىلدى. ناتيجەسىندە ۇيىمداستىرىلعان شارۋاشىلىقتاردا قۇس ەتىن ءوندىرۋ كولەمى وتكەن جىلى 222،7-دەن 235،3 مىڭ تونناعا دەيىن ۇلعايدى»، - دەپ حابارلادى س.وماروۆ.