قازاقستاندا كۇزگى شاقىرۋ ناۋقانى ءجۇرىپ جاتىر

تۇركىستان وبلىسىنداعى شاقىرۋ بارىسىمەن قورعانىس مينيسترلىگى تاربيە جانە يدەولوگيالىق جۇمىس دەپارتامەنتىنىڭ باستىعى ادىلەت پولكوۆنيگى تىلەۋحان باسحوجايەۆ تانىستى، دەپ حابارلايدى almaty-akshamy.kz

ول وبلىستىق قورعانىس ىستەرى جونىندەگى دەپارتامەنتىندە، كەنتاۋ قالاسىنىڭ جيناقتاۋ پۋنكتىندە بولىپ، اسكەرگە شاقىرىلۋشىلاردىڭ مەديسينالىق تەكسەرۋدەن، پسيحولوگيالىق تەستىلەۋدەن ءوتۋ ساپاسىمەن تانىستى.
سارباز انالارى كوميتەتىنىڭ وكىلدەرىمەن جانە قارۋلى كۇشتەردىڭ ارداگەرلەرىمەن كەزدەسۋ ءوتتى. بۇگىندە ولار اسكەرگە شاقىرىلۋشىلارعا ءتۇسىندىرۋ جۇمىستارىن جۇرگىزىپ، ولاردى ىرىكتەۋ پروسەسىندە تۋىندايتىن پروبلەمالىق ماسەلەلەردى شەشۋ جۇمىستارىنا بەلسەندى تۇردە ارالاسىپ كەلەدى.
اسكەرگە شاقىرىلۋشىلارمەن جانە ولاردىڭ اتا-انالارىمەن بولعان اڭگىمەدە تىلەۋحان قاليلاي ۇلى ەلدى قورعاۋ - ءاربىر ەر ادامنىڭ قاسيەتتى پارىزى جانە مىندەتى ەكەنىن اتاپ ءوتتى.

– ءبىزدىڭ اتا-بابالارىمىز عاسىرلار بويى تاۋەلسىزدىك ءۇشىن كۇرەسكەن، ال ءبىز، ولاردىڭ ۇرپاعى، ونى قورعاۋىمىز كەرەك. قىزمەت سەندەردى شىنىقتىرادى، ءارى بولاشاقتاعى مانساپ ءۇشىن دە تاماشا باستاما بولادى، – دەدى ادىلەت پولكوۆنيگى تىلەۋحان باسحوجايەۆ.

ايتا كەتۋ كەرەك، كۇزگى اسكەرگە شاقىرۋ ناۋقانىنىڭ جوسپارى بويىنشا تۇركىستان وبلىسىنان 18 بەن 27 جاس ارالىعىنداعى 2 مىڭنان استام ەر ادام مەرزىمدى اسكەري قىزمەتكە شاقىرىلادى. بۇگىنگى تاڭدا قارۋلى كۇشتەردىڭ اسكەري بولىمدەرىنە، ۇقك شەكارا قىزمەتىنە جانە مەملەكەتتىك كۇزەت قىزمەتىنە وڭىردەن 700-گە جۋىق ادام جىبەرىلدى. كۇزگى شاقىرۋ ناۋقانى اعىمداعى جىلدىڭ 31 جەلتوقسانىنا دەيىن جالعاسادى.