استانادا، كىتاپحاناشىلار كۇنى قارساڭىندا، قازاقستاننىڭ كىتاپحانا سالاسىن دامىتۋعا بايلانىستى وزەكتى ماسەلەلەر تالقىلاندى، دەپ حابارلايدى almaty-akshamy.kz
مادەنيەت جانە اقپارات ءمينيسترى ايدا بالايەۆانىڭ توراعالىعىمەن وتكەن دوڭگەلەك ۇستەل جۇمىسىنا پارلامەنت دەپۋتاتتارى، فيلولوگيا عىلىمدارىنىڭ دوكتورلارى، اكادەميكتەر، كىتاپحانا ءىسىنىڭ ارداگەرلەرى جانە ت. ب. قاتىستى.
ءىس-شارانى اشقان ق ر مادەنيەت جانە اقپارات ءمينيسترى ايدا بالايەۆا تۇركى اقىنى الىشەر ءناۋايدىڭ: "كىتاپ - اقىلعا اقى سۇرامايتىن التىن قازىنا"، - دەگەن ءسوزىن مىسالعا كەلتىردى.
ول وسى باعالى قازىناعا قىزمەت كورسەتەتىن كىتاپحانالار مەن كىتاپحاناشىلاردىڭ جاعدايى ەلدىڭ وركەندەۋىمەن جانە قازاقستاننىڭ سەنىمدى بولاشاعىمەن تىكەلەي بايلانىستى ەكەنىن اتاپ ءوتتى.
""ادىلەتتى قازاقستان – ادال ازامات" ۇلتتىق قۇرىلتايىنىڭ ەكىنشى وتىرىسىندا مەملەكەت باسشىسى "اس ۇرپاقتىڭ كىتاپقا دەگەن قۇشتارلىعىن وياتۋ" ناقتى مىندەتىن قويدى.
پرەزيدەنت ءوزىنىڭ الدىڭعى سوزدەرىندە دە كىتاپحانا سالاسىن دامىتۋعا ەرەكشە نازار اۋداردى. وسىعان بايلانىستى ءبىز پرەزيدەنتتىڭ بارلىق تاپسىرمالارىن ورىنداۋ بويىنشا قاجەتتى شارالاردى قابىلداپ جاتىرمىز"، - دەدى ايدا بالايەۆا، دوڭگەلەك ۇستەلگە قاتىسۋشىلاردى وسى باعىتتاعى جۇمىس ناتيجەلەرى تۋرالى حاباردار ەتە وتىرىپ.
اتاپ ايتقاندا، مينيستر كىتاپحاناشىلاردىڭ جالاقىسىن 2025 جىلعا قاراي 100%-عا ارتتىرۋ ماقساتىندا كىتاپحانا قىزمەتكەرلەرىنىڭ جالاقىسىن جىل سايىن 25%-عا ۇلعايتۋ جونىندەگى جۇمىس تۋرالى اتاپ ءوتتى.
كىتاپ قورىن جاڭارتۋ بويىنشا دا ءبىرقاتار شارالار قابىلدانۋدا. سوڭعى 5 جىلدا، مەملەكەتتىك تاپسىرىس اياسىندا، 4،5 ميلليون كىتاپ شىعارىلدى.
شەتەلدىك بەستسەللەرلەردى قازاق تىلىنە اۋدارۋ - ماڭىزدى اسپەكت بولىپ تابىلادى. سونداي-اق، وقىرمانداردىڭ سۇرانىسىنا ساي كىتاپتار شىعارۋ ءۇشىن وقىرماندار اراسىندا ارنايى الەۋمەتتىك ساۋالنامالار جۇرگىزۋ جوسپارلانۋدا. سونىمەن قاتار، ۇلتتىق ەلەكتروندىق كىتاپحانانى دامىتۋ بويىنشا جۇمىستار دا بەلسەندى جۇرگىزىلۋدە.
"قازاقستاننىڭ ەلەكتروندىق كىتاپحاناسى" جوباسى اياسىندا وقىرماندار "ءبىرىڭعاي بيلەت" ارقىلى ەلىمىزدىڭ كەز كەلگەن كىتاپحاناسىنىڭ ەلەكتروندىق بازاسىنا قولجەتكىزە الاتىنداي بارلىق كىتاپحانالاردى ءبىرىڭعاي اقپاراتتىق جۇيەگە قوسۋ جوسپارلانۋدا. بۇدان بولەك، دوڭگەلەك ۇستەلگە قاتىسۋشىلار وسى سالانى دامىتۋعا قاتىستى ءوز پىكىرلەرىمەن ءبولىستى.
قورىتىندىدا مادەنيەت جانە اقپارات ءمينيسترى ءىس-شارا بارىسىندا ايتىلعان بارلىق ۇسىنىستار ەسكەرىلىپ، تالدانىپ، جۇمىسقا قابىلداناتىنىن اتاپ ءوتتى.
كەرەك دەرەك
ەلىمىزدە 11 مىڭعا جۋىق كىتاپحانا جۇمىس ىستەيدى، ولاردىڭ شتاتىندا 25 مىڭنان استام ادام بار، كىتاپ قورى 328 ميلليون دانادان استى. كىتاپحانا قىزمەتتەرىن پايدالانۋشىلار سانى 9،5 ميلليونعا جەتكەن.