ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ كريپتوۆاليۋتا ايىرباستاۋ پۋنكتتەرىن اشۋ ءتارتىبىن ءتۇسىندىردى، دەپ حابارلايدى aqshamnews.kz
وسى ۋاقىتقا دەيىن كاسىپكەرلەردەن كريپتوۆاليۋتا ايىرباستاۋ پۋنكتتەرىن اشۋعا 72 ءوتىنىم تۇسكەن. ءبىراق بارلىعى بانك تۋرالى زاڭنىڭ قابىلدانعانىن كۇتىپ وتىر. ول قۇجاتتى كۇنى كەشە ءماجىلىس دەپۋتاتتارى سەناتتىڭ قاراۋىنا جىبەرىپ قويدى.
"زاڭ جەلتوقساننىڭ سوڭىنا دەيىن قابىلدانادى. ودان كەيىن نورماتيۆتىك-قۇقىقتىق اكتىلەردى راسىمدەۋگە ءۇش اي بەرىلەدى. سونىڭ ىشىندە ءوتىنىم بەرۋ، قاراۋ جانە ليسەنزيا بەرۋ شارالارى بار. ال كريپتوۆاليۋتا ايىرباستاۋ پۋنكتەرى اشىلعاننان كەيىن كريپتوۆاليۋتانى ەمىن-ەركىن ايىرباستاۋعا بولادى، كادىمگىدەي دوللاردى قالاي ايىرباستايمىز، تۋرا سولاي كريپتوۆاليۋتانى ايىرباستاۋعا مۇمكىندىك بولادى"،-دەدى شولپانقۇلوۆ.
ونىڭ ايتۋىنشا، كريپتوۆاليۋتا ايىرباستاۋ پۋنكتتەرىنە قاتىستى تالاپتار بولادى. اتاپ ايتقاندا، اقشا اينالىمى بانكتەر ارقىلى ءوتۋى كەرەك. ال كريپتو ءاميان حالىقارالىق قارجى ورتالىعىندا تىركەلۋى شارت.
ايتا كەتەرى، قازىرگى كەزدە قازاقستانداعى كريپتوۆاليۋتا "استانا" حالىقارالىق قارجى ورتالىعى اياسىندا رەتتەلگەن. بيىل قاڭتار-قىركۇيەك ايلارىندا ول جاقتا كريپتواكتيۆتەردىڭ جالپى اينالىمى 5،4 ملرد دوللاردى قۇرادى. ال جاڭا زاڭمەن كريپتوۆاليۋتانى رەسپۋبليكا اۋماعىندا رەتتەۋ تەتىكتەرى ەنگىزىلەدى.