قازاقستاندىقتار الەۋمەتتىك-ەڭبەك سالاسىندا 45 كورسەتىلەتىن مەملەكەتتىك قىزمەتتى الا الادى.
الەۋمەتتىك-ەڭبەك سالاسىنداعى مەملەكەتتىك كورسەتىلەتىن قىزمەتتەردى سيفرلاندىرۋ دەڭگەيى 95%-عا جەتتى، دەپ Almaty-akshamy.kz.
مامانداردىڭ ايتۋىنشا، قول جەتىمدى 45 قىزمەتتىڭ 43ء-ىن ەلەكتروندىق فورماتتا الۋعا بولادى. جالپى، ق ر ەڭبەك جانە حالىقتى الەۋمەتتىك قورعاۋ مينيسترلىگى كورسەتەتىن قىزمەتتەردى دامىتۋ تۇراقتى نەگىزدە جۇرگىزىلەدى. مەملەكەتتىك كورسەتىلەتىن قىزمەتتەردى ترانسفورماسيالاۋ جانە رەينجينيرينگتەۋ، اقپاراتتىق جۇيەلەردى دامىتۋ جانە ينتەگراسيالاۋ، مۇمكىندىكتەرگە قول جەتكىزۋدى جەڭىلدەتۋ جانە قازاقستاندىقتار ءۇشىن ولاردىڭ سانىن كەڭەيتۋ بويىنشا جۇمىستار جۇرگىزىلۋدە.
«ەلىمىزدىڭ ازاماتتارى الەۋمەتتىك-ەڭبەك سالاسىندا 45 مەملەكەتتىك كورسەتىلەتىن قىزمەتتى الا الادى، ونىڭ 43ء-ى، ياعني 95%-ى ەلەكتروندىق فورماتتا قول جەتىمدى، ال جارتىسىن پرواكتيۆتى تۇردە الۋعا بولادى. جالپى، سيفرلىق قۇرالداردىڭ ارقاسىندا جىل باسىنان بەرى ازاماتتار 15،6 ملن مەملەكەتتىك كورسەتىلەتىن قىزمەتتى نەمەسە وسى جىلعى قازىرگە دەيىن كورسەتىلگەن قىزمەتتەردىڭ جالپى سانىنىڭ 87%-ىن الدى. ءبىز بۇل جۇمىستى ۇنەمى جالعاستىراتىن بولامىز. بيىلعى جىلدىڭ باسىنان باستاپ «ەلەكتروندىق ۇكىمەت» پورتالىندا تاعى 5 مەملەكەتتىك كورسەتىلەتىن قىزمەت ىسكە اسىرىلدى»، – دەدى ۆيسە-مينيستر ەربول وسپانوۆ.
وسى جىلى سيفرلاندىرىلعان قىزمەتتەرگە مىنالار جاتادى: ەڭبەك ەتۋ قابىلەتىنەن ايىرىلعان جاعدايدا، اسىراۋشىسىنان ايىرىلعان جاعدايدا، جۇكتىلىك پەن بوسانۋعا بايلانىستى تابىسىنان ايىرىلعان جاعدايدا الەۋمەتتىك تولەم تاعايىنداۋ، قانداس مارتەبەسىن بەرۋ نەمەسە ۇزارتۋ.
سونداي-اق، 2022 جىلى «جەرلەۋگە ءبىرجولعى تولەم تاعايىنداۋ» مەملەكەتتىك كورسەتىلەتىن قىزمەتى پرواكتيۆتى فورماتقا اۋىستىرىلدى.
«مينيسترلىك ەكىنشى دەڭگەيدەگى بانكتەردىڭ ءموبيلدى قوسىمشالارى ارقىلى قىزمەتتەردى الۋ مۇمكىندىگىن ىسكە اسىرۋ بويىنشا جۇمىس جۇرگىزۋدە. وتكەن جىلى بالا تۋۋىنا بايلانىستى 2 قىزمەت ىسكە اسىرىلدى، ال وسى جىلدىڭ تامىز جانە قىركۇيەك ايلارىندا تاعى 4 قىزمەت قوسىلدى. ولار جۇمىسسىز رەتىندە تىركەلگەنى تۋرالى انىقتاما، بجزق سالىمشىسىنىڭ قاراجاتىنىڭ ءتۇسۋى مەن قوزعالىسى تۋرالى اقپارات بەرۋ، اسىراۋشىسىنان ايىرىلعان جاعدايدا الەۋمەتتىك تولەم تاعايىنداۋ جانە ءوتىنىش بەرۋشىنىڭ ااك الۋشىلارىنا تيەسىلىگىن راستايتىن اقپارات بەرۋ. ىسكە اسىرىلعان مۇمكىندىكتەردىڭ ارقاسىندا 173 مىڭنان استام ادام مەملەكەتتىك قىزمەتتەردى بانكتىك قوسىمشالار ارقىلى الدى»، – دەپ ءبولىستى ەربول وسپانوۆ.
قازىرگى ۋاقىتتا بىرنەشە پيلوتتىق جوبالار ىسكە اسىرىلۋدا. اتاپ ايتاتىن بولساق ماراپاتتالعان كوپبالالى انالارعا مەملەكەتتىك جاردەماقى تاعايىنداۋ پروسەسىن اۆتوماتتاندىرۋ، سونداي-اق جەرگىلىكتى اتقارۋشى ورگاندار مۇقتاج ازاماتتاردىڭ جەكەلەگەن ساناتتارىنا «ازاماتتارعا ارنالعان ۇكىمەت» مك» كەاق ارقىلى بەرەتىن الەۋمەتتىك كومەكتى تولەۋ.
2020 جىلى مۇگەدەكتىگى بار ادامدارعا تەحنيكالىق قۇرالدار مەن وڭالتۋ قىزمەتتەرىن ءوندىرۋشى مەن جەتكىزۋشىنى ءوز بەتىنشە تاڭداۋعا مۇمكىندىك بەرەتىن الەۋمەتتىك قىزمەتتەر پورتالى ىسكە قوسىلعانىن ايتا كەتۋ كەرەك. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق سيفرلىق قولتاڭباسىمەن راستاۋ ارقىلى جۇزەگە اسىرىلادى.
«پورتالدىڭ كومەگىمەن 2021 جىلى مۇگەدەكتىگى بار ادامدار 371 مىڭنان استام قىزمەت الدى، بۇل كورسەتكىش جىل سايىن ارتىپ كەلەدى. مىسالى، وڭالتۋ باعدارلامالارىن ورىنداۋ 2019 جىلعى 69% - دان 2021 جىلى 88% - عا دەيىن ءوستى. بيىلعى جىلى باعدارلامالاردى ورىنداۋ دەڭگەيى شامامەن 90% جەتەدى دەپ كۇتىلۋدە.
بۇدان باسقا، وڭالتۋ جانە الەۋمەتتىك قىزمەتتەر كورسەتۋ قۇرالدارىن رەسىمدەۋ قىزمەتتەرى كەزەڭ-كەزەڭىمەن پرواكتيۆتى فورماتتا ىسكە اسىرىلادى، ياعني وڭالتۋدىڭ جەكە باعدارلامالارىندا كوزدەلگەن بارلىق شارالار اۆتوماتتى تۇردە الەۋمەتتىك قىزمەتتەر پورتالىنا جىبەرىلەدى»، – دەپ حابارلادى ۆيسە-مينيستر.
بيىلعى جىلدىڭ قىركۇيەك ايىندا الەۋمەتتىك سالادا، سونداي-اق دەنساۋلىق ساقتاۋ، ءبىلىم بەرۋ سالالارىندا مەملەكەتتىك قولداۋ شارالارىن پرواكتيۆتى تاعايىنداۋدى ىسكە اسىرۋ ءۇشىن جاڭا اقپاراتتىق جۇيە – «وتباسىنىڭ سيفرلىق كارتاسى» (بۇدان ءارى – وسك) جۇمىس ىستەي باستادى.
وتباسىنىڭ سيفرلىق كارتاسىنىڭ نەگىزگى ماقساتى ءوتىنىش بەرۋشىدەن مەملەكەتتىك كورسەتىلەتىن قىزمەت كورسەتۋدىڭ انىقتاۋ فورماتىنا كوشۋ جانە حالىقتىڭ قاجەتتىلىكتەرىن ۋاقتىلى قاناعاتتاندىرۋ بولىپ تابىلادى.
وتباسىنىڭ سيفرلىق كارتاسى مەملەكەتتىك ورگانداردىڭ 24 اقپاراتتىق جۇيەسىمەن ينتەگراسيالانعان جانە ولاردىڭ مالىمەتتەرى نەگىزىندە وتباسى قۇرامىن اۆتوماتتى تۇردە ايقىندايدى جانە ءومىر ءسۇرۋ دەڭگەيىن باعالاۋدى قالىپتاستىرادى.
بۇگىنگى تاڭدا وتباسىنىڭ سيفرلىق كارتاسى ارقىلى جاردەماقىلار مەن الەۋمەتتىك تولەمدەردىڭ 10 ءتۇرى بويىنشا قىزمەت الۋ مۇمكىندىگى بار، 38،7 مىڭ ازاماتقا قىزمەت كورسەتۋگە كەلىسىم الۋ ءۇشىن SMS-حابارلامالار جولداندى، ولارعا 8،7 مىڭ ادام جاۋاپ بەردى.
جۇمىسپەن قامتۋ سالاسىندا كورسەتىلەتىن شارالار مەن قىزمەتتەرگە كەلەتىن بولساق، 2020 جىلى پاندەميا جاعدايىندا ولاردى ەلەكتروندىق ەڭبەك بيرجاسى (بۇدان ءارى – ەەب) ارقىلى ونلاين فورماتتا كورسەتۋگە كوشۋ جۇزەگە اسىرىلعانىن اتاپ وتكەن ءجون. بۇل سيفرلىق جۇمىسپەن قامتۋ ورتالىقتارىنا كوشۋ بويىنشا ۇلكەن جۇمىستىڭ ءبىر بولىگى.
2022 جىلدىڭ باسىنان باستاپ جۇمىس ىزدەپ جۇرگەن 354 مىڭ ادام نەمەسە ولاردىڭ جالپى سانىنىڭ 60%-ى ونلاين فورماتتا تىركەلگەن. سيفرلىق جۇمىسپەن قامتۋ ورتالىقتارى ارقىلى جۇمىسپەن قامتىلعانداردىڭ ۇلەسى 106 مىڭ نەمەسە 30%-دى قۇرادى.
«قازىرگى ۋاقىتتا ەەب-عا 4 مەملەكەتتىك كورسەتىلەتىن قىزمەت جانە حالىقتى جۇمىسپەن قامتۋدى قولداۋدىڭ 9 شاراسى اۋىستىرىلدى. ونلاين قىزمەتتەردى ىسكە قوسۋ حالىقتىڭ جۇمىسپەن قامتۋ ورتالىقتارىنىڭ قىزمەتكەرلەرىمەن فيزيكالىق بايلانىسىن بارىنشا ازايتۋعا جانە ازاماتتار ءۇشىن قىزمەتتەردىڭ قولجەتىمدىلىگىن ارتتىرۋعا مۇمكىندىك بەردى. وسى جىلى ەەب ارقىلى جۇمىسپەن قامتۋعا جاردەمدەسۋدىڭ بارلىق بەلسەندى شارالارىن كورسەتۋدىڭ ونلاين فورماتىنا كوشۋ جالعاسادى»، – دەدى ەربول وسپانوۆ.
جالپى، ەەب بازاسىندا ازاماتتاردى كاسىپ تاڭداۋدان باستاپ ەڭبەك قاتىناستارىن رەسىمدەۋگە دەيىنگى كاسىبي جولىندا سۇيەمەلدەيتىن ءبىرىڭعاي سيفرلىق ەكوجۇيەنى قالىپتاستىرۋ جوسپارلانۋدا.
«ەڭبەك.kz باستى پورتالى، جۇمىسپەن قامتۋدىڭ ءبىرىڭعاي سيفرلىق پلاتفورماسىنان باسقا، جۇمىسپەن قامتۋ سالاسىنداعى بولاشاق «قىزمەتتەر سۋپەرماركەتىن» قۇرايتىن تاعى 4 نەگىزگى ەلەمەنتتى ىسكە اسىردى. ولار «Skills.Enbek» ونلاين-وقىتۋ الاڭى، جۇمىسكەر مەن جۇمىس بەرۋشىنىڭ ءوزارا ءىس-قيمىلى كەزىندە قاعازباستىلىقتى بارىنشا ازايتۋعا مۇمكىندىك بەرەتىن ەڭبەك رەسۋرستارى پورتالى «HR.Enbek»، «Business.Enbek» – بيزنەس-يدەيالارىن ىسكە اسىرۋعا مەملەكەتتىك گرانتتار الۋدىڭ بارلىق پروسەستەرىن اۆتوماتتاندىرۋ جونىندەگى پلاتفورما، سونداي-اق ارمەنيا، بەلارۋس، قىرعىزستان جانە رەسەيدىڭ ۇلتتىق اقپاراتتىق جۇيەلەرىنە قول جەتكىزە الاتىن «شەكاراسىز جۇمىس» ءبىرىڭعاي ىزدەۋ جۇيەسى» – دەپ حابارلادى ەربول وسپانوۆ.