جوبا بالالار جىلى اياسىندا جۇزەگە اسىرىلدى.
مادەنيەت جانە سپورت مينيسترلىگى «ارمان اسۋلارى» اتتى الەۋمەتتىك پيلوتتىق جوبانى قولعا الدى، دەپ حابارلايدى Almaty-akshamy.kz
جوبانىڭ باستى ماقساتى – قازاقستاننىڭ بارلىق وڭىرىنەن ەرەكشە ءبىلىم بەرۋ قاجەتتىلىگى بار دارىندى بالالارعا قولداۋ كورسەتۋ، شىعارماشىلىق باعىتتا دامىتۋ. وسىعان وراي استانادا رەسپۋبليكالىق فەستيۆال ءوتتى. فەستيۆالگە 150-دەن استام ەرەكشە قاجەتتىلىگى بار دارىندى بالالار قاتىستى، دەپ حابارلايدى مادەنيەت جانە سپورت مينيسترلىگى.
مادەنيەت جانە سپورت ءمينيسترى داۋرەن ابايەۆ گالا كونسەرتكە قاتىسقان بالالاردى قۇتتىقتاپ، ينكليۋزيۆتى ءبىلىم بەرۋ مەن قوعامدى دامىتۋدا مۇنداي جوبانىڭ ماڭىزى زور ەكەنىن اتاپ ءوتتى.
«ونەر – ادامنىڭ جانىن عانا ەمدەمەيدى، ونىڭ تانىنە دە تىرەك بولادى. بالالاردىڭ تالانتىن اشۋدا مۇنداي الاڭدار قاشاندا قاجەت. سوندىقتان وسى جوبانى جۇزەگە اسىرۋعا اتسالىسقان ازاماتتاردىڭ بارلىعىنا العىس ايتامىن. سىزدەر بالالاردى باقىتتى، ال قوعامدى مەيىرىمدى ەتۋگە ۇلەس قوسىپ وتىرسىزدار»، - دەدى داۋرەن ابايەۆ.
گالا-كونسەرتتە تالانتتى بالالار تانىمال جۇلدىزدارمەن بىرگە ونەر كورسەتتى. ۇيىمداستىرۋشىلار مۇنى فەستيۆال ەرەكشەلىگىنىڭ ءبىرى رەتىندە اتاپ ءوتتى.