قازاقستاندا كوروناۆيرۋسپەن ناۋقاستانۋ ءوسىمى 2 پايىزعا تومەندەدى. بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي ءمالىم ەتتى، دەپ حابارلايدى almaty-akshamy.kz.
«الەمدەگى احۋال كۇردەلى بولىپ وتىر. بۇكىل الەمدە كوروناۆيرۋس ينفەكسياسىنىڭ شامامەن 208 ملن جاعدايى تىركەلگەن. تاۋلىگىنە 480 مىڭنان استام جاعداي تىركەلىپ وتىر. 4،3ملن-نان استام قازا تاپتى. دۇنيەجۇزىلىك دەنساۋلىق ساقتاۋ ۇيىمىنىڭ 6 ءوڭىرىنىڭ تورتەۋىندە شىلدە ايىنىڭ ەكىنشى ونكۇندىگىنەن باستاپ ناۋقاستانۋدىڭ ارتۋى بايقالادى. جاڭا جاعدايلاردىڭ ايتارلىقتاي ءوسىمى امەريكا ەلدەرى وڭىرىندە، تىنىق مۇحيتىنىڭ باتىس بولىگىندە تىركەلگەن»، دەدى الەكسەي سوي.
ونىڭ دەرەگىنشە، دۇنيەجۇزىلىك دەنساۋلىق ساقتاۋ ۇيىمىنا مۇشە 228 ەلدىڭ 38-ىندە اۋرۋدىڭ جاڭا جاعدايلارى 50 پايىزدان استام ارتىپ وتىر.
«سوڭعى اپتادا اۋرۋدىڭ ەڭ جوعارى ءوسىمى ازەربايجاندا بايقالدى. بۇل ەلدە ءبىر اپتانىڭ ىشىندە اۋرۋ 131 پايىزعا، ال يزرايلدە 63، جاپونيادا 21 پايىزعا ءورشىدى. قازاقستاندا اپتا ىشىندە ءوسىم 2 پايىزعا تومەندەدى»، - دەدى مينيستر.