الماتىداعى ونكولوگتار اۋرۋى اسقىنعان 44 جاسار ايەلدى قۇتقارىپ قالدى. الماتى قالالىق ونكولوگيا ورتالىعىنا 1977 جىلى تۋعان، 4-ساتىلى جوعارى جاعىنداعى جاقسۇيەگى قويناۋىنىڭ اسقىنۋ قاتەرلى ىسىگىمەن اۋراتىن ايەل جاتقىزىلدى. پاسيەنتتىڭ ايتۋى بويىنشا، قاتەرلى ىسىك 2019 جىلدىڭ ناۋرىزىنان بەرى پايدا بولعان. الايدا دارىگەرگە جۇگىنبەگەن. ورتالىقتىڭ ونكولوگتارى تەكسەرگەن كەزدە: وڭ جاقتان تورلى سۇيەك كەڭسىرىگى ءلابيرينتىنىڭ تورشاعا تارالۋىمەن وڭ جاق ساماي سۇيەگىنىڭ، وڭ جاق كوز شاراسىنىڭ لاتەرالدى جانە استىڭعى قابىرشاعىنىڭ بۇزىلۋىمەن جانە تارالۋىمەن وڭ جاقتى گايمور قويناۋىنىڭ پايدا بولۋى سەكىلدى دياگنوز قويىلدى. 

پاسيەنتكە شۇعىل تۇردە حيرۋرگ مامانداردىڭ وتا جاساۋى قاجەت بولدى. وپەراسيا كەزىندە دارىگەرلەر بەت سۇيەگىن جارىپ، باس ميىنا كەتكەن ۇلكەن ىسىكتى الىپ تاستادى. سودان حيرۋرگ بىرساتتە وپەراسيادان كەيىنگى تۋىنداعان "كەمشىلىكتى" جويدى، سەبەبى ىسىكتى الىپ تاستاعاننان سوڭ بەت الپەتىندەگى كەمىستىگى كورىنىپ، كوزىنىڭ الماسى تومەن ءتۇسىپ كەتكەن.

«تيتاندى پلاستينامەن ءبىز بەت سۇيەگىنىڭ وپەراسيادان سوڭعى قالعان كەمىستىكتەردى قالپىنا كەلتىردىك. وپەراسيا ءساتتى ءوتتى. بۇگىندە  پاسيەنت ءوزىن جاقسى سەزىنەدى جانە ءوز بەتىمەن تاماقتانا الادى»، – دەدى حيرۋرگ-ونكولوگ ساتتار اپپازوۆ.

وپەراسيا 5 ساعاتقا سوزىلدى. جالپى 7 اي ارالىعىندا الماتى قالالىق ونكولوگيا ورتالىعىندا 10300 پاسيەنت ەمدەلىپ شىققان. سونداي-اق، ونكولوگتار سكرينينگتەن ءوتۋدى قاتەرلى ىسىكتى ەرتە ساتىدا انىقتاۋدىڭ ءتيىمدى ءادىسى بولىپ سانالاتىنىن ەسكەردى. اۋرۋ بەلگىلەرى وتە كەش ساتىدا بىلىنسە جانە ىسىكتىڭ تارالۋى مۇمكىندىگى انىقتالسا،  اۋرۋدى ەمدەۋ قيىنعا تۇسەدى.

اوو باسپا ءسوز قىزمەتى