بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا الماتى قالاسىنىڭ تۇرعىن ءۇي ساياساتى باسقارماسىنىڭ باسشىسى دانيار قىرىقبايەۆ مالىمدەدى، دەپ حابارلايدى almaty-akshamy.kz
دانيار قىرىقبايەۆتىڭ ايتۋىنشا، بۇگىندە كوممۋنالدىق تۇرعىن ءۇي قورىنان باسپاناعا مۇقتاج جانداردىڭ كەزەگىندە 30 880 ازامات تۇر. ونىڭ ىشىندە: 1 908 – جەتىم بالالار؛ 3 268 – كوپ بالالى وتباسىلار؛ 11 292 – بيۋدجەتتىك ۇيىمداردىڭ قىزمەتكەرلەرى؛ 14 412 – حالىقتىڭ الەۋمەتتىك وسال توپتارى.
«جىل باسىنان بەرى 1 909 ازامات تۇرعىن ۇيمەن قامتاماسىز ەتىلدى. ونىڭ ىشىندە 41 ادام كوممۋنالدىق تۇرعىن ءۇي قورىنان پاتەر الدى، ياعني جالدامالى، ساتىپ الۋ قۇقىعىنسىز، 1117 - «شاڭىراق» باعدارلاماسى بويىنشا 13 ميلليارد 500 ملن تەڭگەگە جۋىق، تاعى 85 ادام - «باقىتتى وتباسى» باعدارلاماسى بويىنشا (2-10- 20) 118 ملن 400 مىڭ تەڭگەگە جانە 666 ادام «الماتى جاستارى» باعدارلاماسى بويىنشا (5-10-25) 8 ميلليارد 800 ميلليون تەڭگە سوماسىندا»، - دەدى تۇرعىن ءۇي ساياساتى باسقارماسىنىڭ باسشىسى.
دانيار قىرىقبايەۆتىڭ ايتۋىنشا، بيىل 6 047 الماتىلىقتى تۇرعىن ۇيمەن قامتاماسىز ەتۋ جوسپارلانعان. ونىڭ ىشىندە 1 451 ادام جالدامالى باسپاناعا ساتىپ الۋ قۇقىعىنسىز كوشە الادى، كەزەكتە تۇرعان 401 ادامعا پاتەر ساتىپ الۋ قۇقىعىنسىز جالعا (185 - كوپ بالالى وتباسىلار؛ 216 - حالىقتىڭ الەۋمەتتىك وسال توپتارى) بەرىلەدى. جۇمىس ىستەيتىن 29 جاسقا دەيىنگى جاستار ءۇشىن 1 050 پاتەر ساتىپ الۋ قۇقىعىنسىز 5 جىلعا جالعا بەرىلدى، 35 جاسقا دەيىنگى «الماتى جاستارى» باعدارلاماسى بويىنشا - 1 000 پاتەر .
«الماتى قالاسىنىڭ اكىمى باقىتجان ساعىنتايەۆتىڭ تاپسىرماسى بويىنشا «شاڭىراق»، «باقىتتى وتباسى»، «نەسيەلىك تۇرعىن ءۇي» جەڭىلدىك نەسيەلىك باعدارلامالارى بويىنشا باستاپقى تولەم ءۇشىن نومينالى 1 ميلليون تەڭگەنى قۇرايتىن 2 000 قايتارىمسىز تۇرعىن ءۇي سەرتيفيكاتىن بەرۋ تۋرالى شەشىم قابىلداندى»، - دەدى دانيار قىرىقبايەۆ.
تۇرعىن ءۇي سەرتيفيكاتى جەتىم بالالارعا، كوپ بالالى وتباسىلارعا، مۇگەدەك بالاسى بار وتباسىلارعا، 1 جانە 2 توپتاعى مۇگەدەكتەرگە بەرىلەدى. ايتا كەتەرلىگى، 2 شىلدەدەن 17 تامىز ارالىعىندا 127 ءوتىنىم قابىلدانىپ، ماقۇلداندى.