كورسەتكىش وتكەن جىلدىڭ وسى كەزەڭىمەن سالىستىرعاندا 2،5% كوپ.
ۇلتتىق ستاتيستيكا بيۋروسىنىڭ مالىمەتىنشە، 2024 جىلعى قازاندا 170،4 مىڭ اۆتوموبيل ەسەپكە قويىلدى، دەپ حابارلايدى aqshamnews.kz
«2024 جىلعى 1 قاراشاداعى جاعداي بويىنشا، قازاقستاندا تىركەلگەن كولىكتەر سانى 5 652،4 مىڭدى قۇرادى، ونىڭ ىشىندە 88% – جەڭىل اۆتوكولىكتەر، 9،9% – جۇك اۆتوموبيلدەرى مەن 2،1% – اۆتوبۋستار»،-دەلىنگەن بيۋرو تاراتقان اقپاراتتا.
سونىمەن قاتار، تىركەلگەن جەڭىل كولىكتەردىڭ جالپى سانىنىڭ قوزعالتقىش كولەمى بويىنشا ەڭ كوپ ۇلەسى (43،9%) 1500-2000 سم3 كولەمىندەگى جەڭىل اۆتوكولىكتەرىنە تيەسىلى. قوزعالتقىش كولەمى 1500 سم3 دەيىنگى جەڭىل كولىك ۇلەسى – 19،3%، 2000-2500 سم3 ارالىعىندا – 17،4%، 2500-4000 سم3 – 14،9%، 4000 سم3 جوعارىلار – 1،9%.
قوزعالتقىش كولەمى 1500-2000 سم3 ارالىعىنداعى جەڭىل اۆتوموبيلدەردىڭ ەڭ كوپ سانى الماتى وبلىسىندا – 232،9 مىڭ، الماتى – 217،4 مىڭ جانە استانا قالالارىندا – 168،7 مىڭ، سونداي-اق، قاراعاندى وبلىسىندا – 158،2 مىڭ.