ق ر پرەمەر-مينيسترى ولجاس بەكتەنوۆ قوستاناي وبلىسىنا جۇمىس ساپارى بارىسىندا ءوڭىردىڭ ونەركاسىپتىك الەۋەتىمەن تانىستى. پرەزيدەنتتىڭ جولداۋدا ايتىلعان جوعارى قايتا وڭدەۋدى يگەرۋ جانە لوكاليزاسيا دەڭگەيىن ارتتىرۋ جونىندەگى تاپسىرمالارىنىڭ ورىندالۋ بارىسىن تەكسەردى، دەپ حابارلايدى aqshamnews.kz
پرەمەر-مينيسترگە بيىلعى 11 ايدا قوستاناي وبلىسىندا ونەركاسىپ ءونىمىن ءوندىرۋ كولەمى 2،5 ترلن تەڭگەگە جەتكەنى، وڭدەۋ ونەركاسىبىنىڭ ۇلەسى 72%-دان اسقانى باياندالدى. وسى جىلى وڭىردە قۇنى 124،7 ملرد تەڭگە بولاتىن 6 يندۋستريالىق جوبا ىسكە اسىرىلىپ، 1 301 جۇمىس ورنى اشىلدى.
Caspian Steel QZ ۇساق سۇرىپتى يلەم وندىرەتىن كاسىپورىندا ولجاس بەكتەنوۆ تەحنولوگيالىق پروسەسپەن جانە كومپانيانىڭ بولات دايىنداماسىن شىعارۋعا باعىتتالعان جاڭا زاۋىت سالۋ جونىندەگى جوسپارىمەن تانىستى. جۇمىس ىستەپ تۇرعان كاسىپورىننىڭ قۋاتى جىلىنا 450 مىڭ توننانى قۇرايدى. وسىلايشا، بيىلعى 10 ايدا 311،4 مىڭ توننا بولات يلەم جانە 10،9 مىڭ توننا مەتالل سىنىقتارى ءوندىرىلدى. زاۋىت ونىمدەرى ىشكى قاجەتتىلىكتەردى وتەپ، سىرتقى نارىققا شىعارىلادى. جىل باسىنان بەرى 32 ملرد تەڭگەدەن استام سوماعا 112،6 مىڭ توننا ۇساق سۇرىپتى يلەم ەكسپورتتالدى.
بولات دايىندامالار وندىرەتىن جاڭا كاسىپورىننىڭ بولجامدى قۋاتى جىلىنا 1 ملن توننانى قۇرايدى. Caspian Group كومپانياسىنىڭ ديرەكتورى الەكساندر كيم جوباعا $650 ملن ينۆەستيسيا سالۋ جوسپارلانعانىن ايتتى. زاۋىت پايدالانۋعا بەرىلگەن كەزەڭدە 600 ادامدى جۇمىسپەن قامتاماسىز ەتىپ، مەردىگەر ۇيىمداردا تاعى 400 جۇمىس ورنى اشىلادى. كاسىپورىندا جاھاندىق «جاسىل» ەكونوميكاعا كوشۋ شەڭبەرىندە قورشاعان ورتاعا اسەرىن بارىنشا ازايتاتىن سوڭعى بۋىنداعى ەلەكتر دوعالى پەشتەردى پايدالانۋ جوسپارلانىپ وتىر. جوبانى جۇزەگە اسىرۋ شىعارىلاتىن تۇپكىلىكتى ونىمدەگى وتاندىق قامتۋدى 99%-عا دەيىن ارتتىرا وتىرىپ، ارماتۋرالىق يلەم ءوندىرىسىن لوكاليزاسيالاۋعا مۇمكىندىك بەرەتىنى اتاپ ءوتىلدى. سونىمەن قاتار وڭىردەگى وڭدەۋ ونەركاسىبىنىڭ ۇلەسى 12،3%-عا ارتادى.
ولجاس بەكتەنوۆ ينۆەستيسيالىق جوبانىڭ ماڭىزدىلىعىنا توقتالىپ، ءىرى يندۋستريالىق وندىرىستەر توڭىرەگىندە شاعىن جانە ورتا بيزنەس بەلدەۋىن قالىپتاستىرۋ قاجەتتىگىن ايتتى.
«پرەزيدەنت ۇكىمەتكە ەكونوميكالىق ءوسۋدىڭ جاڭا كوزدەرىن تابۋ تۋرالى ناقتى مىندەت قويدى. ءاربىر ءوڭىردىڭ وزىندىك كۇشتى جاقتارى بار جانە ءبىز وبلىستىڭ، ەلىمىزدىڭ ەكونوميكاسىنا جانە جالپى حالىقتىڭ ءال-اۋقاتىن جاقسارتۋ جۇمىستارىندا ناقتى وسىمگە قول جەتكىزەتىن الەۋەتتى بارىنشا اشۋعا تىرىسامىز. ءبىز تاڭداعان ەكونوميكالىق پاتريوتيزم جولى جاڭا وتاندىق زاۋىتتار مەن وندىرىستەر تۇرىندە ءوز جەمىسىن بەرۋدە، ولار ءوز كەزەگىندە اينالاسىندا تاعى ءبىر شوب بولىگىن دامىتۋدا. مۇنىڭ بارلىعى وتاندىق ەكونوميكانىڭ ءوزىن-وزى قامتاماسىز ەتۋىن ارتتىرۋعا جانە ءونىمدى جۇمىس ورىندارىن قۇرۋعا مۇمكىندىك بەرەدى»، — دەپ اتاپ ءوتتى پرەمەر-مينيستر.
ولجاس بەكتەنوۆ قۋاتى جىلىنا 45 مىڭ توننا جۇك كولىكتەرىنە ارنالعان شويىن قۇيمالارىنىڭ نەگىزگى ءوندىرۋشىسى – KamLitKZ زاۋىتى بازاسىندا قارا مەتاللۋرگيانىڭ دامۋىمەن تانىستى. پرەمەر-مينيسترگە نەگىزگى تەحنولوگيالىق پروسەسس اۆتوكولىك بولشەكتەرىن ءوندىرۋدىڭ تولىق سيكلىن قامتيتىنى جانە ءونىمنىڭ حالىقارالىق ساپا ستاندارتتارىنا سايكەس كەلۋىن قامتاماسىز ەتەتىنى باياندالدى. 2025 جىلى قۋاتتى جىلىنا 75 مىڭ ونىمگە دەيىن جەتەتىن دالمە-دال شتامپتاۋدىڭ وزىق تەحنولوگيالارىن قولداناتىن ەكىنشى زاۋىتتى ىسكە قوسۋ جوسپارلانعان.
بۇگىنگى تاڭدا قوستاناي وبلىسى ماشينا جاساۋ سالاسى بويىنشا رەسپۋبليكادا كوش باستاپ تۇر. پرەمەر-مينيسترگە Kia اۆتوكولىگىن وندىرەتىن زاۋىت سالىنىپ جاتقان يندۋستريالىق ايماق اۋماعىندا وڭىردەگى اۆتوموبيل جاساۋ قارقىنى تۋرالى باياندالدى. جوبانىڭ جالپى قۇنى $200 ملن-عا باعالانىپ وتىر، ونىڭ 80%-عا جۋىعى تىكەلەي شەتەلدىك ينۆەستيسيا. كاسىپورىندى ىسكە قوسۋ 2025 جىلعا جوسپارلانعان، بۇگىندە نەگىزگى وندىرىستىك كورپۋستى سالۋ، ىرگەتاسىن قالاۋ، سونداي-اق مەتالل كونسترۋكسيالارىن مونتاجداۋ جۇمىستارى اياقتالدى. ولجاس بەكتەنوۆكە لاك-بوياۋ ءوندىرىسىن، ونىڭ ىشىندە پوليمەرلى جابىنداردىڭ بارلىق تۇرلەرىن لوكاليزاسيالاۋدىڭ جوعارى دەڭگەيىن قامتاماسىز ەتەتىن ءوندىرىستى قۇرۋ جوسپارلار تۋرالى باياندالدى، زاۋىتتىڭ تولىق جوبالىق قۋاتى جىلىنا 70 مىڭ اۆتوكولىكتى قۇرايدى. كاسىپورىن ونىمدەرى شاعىن توراپتى قۇراستىرۋ ءادىسىن قولدانا وتىرىپ شىعارىلادى. ءوندىرىس 68 روبوتپەن جابدىقتالادى. زاۋىت ىسكە قوسىلعاندا جوعارى اقى تولەنەتىن 1،5 مىڭ جاڭا جۇمىس ورنى اشىلادى.
پرەمەر-مينيستر ەلىمىزدەگى اۆتوموبيل شىعاراتىن جەتەكشى كاسىپورىنداردىڭ ءبىرى «سارىارقااۆتوپروم» كومپانياسىنىڭ وندىرىستىك قۋاتىن قاراپ شىعىپ، تولىق سيكل بويىنشا اۆتوكولىكتەر قۇراستىرۋدىڭ تەحنولوگيالىق پروسەستەرى ەرەكشەلىكتەرىمەن تانىستى. زاۋىتتىڭ باس ديرەكتورى سىرىم سەمەيبايەۆ 2024 جىلى شىعارىلاتىن ءونىم كولەمىن 90 مىڭ اۆتوموبيلگە جەتكىزۋ جوسپارلانىپ وتىرعانىن ايتتى. ءوندىرىس جەلىسىندە JAC، Kia، Chevrolet، Jetour، Hongqi، Skoda سياقتى برەندتەر ۇسىنىلعان.
زاۋىتتا فيزيكالىق جانە سيفرلىق قاۋىپسىزدىكتى بىرىكتىرەتىن يننوۆاسيالىق پلاتفورما سانالاتىن بىرەگەي «جەدەل ارەكەت ەتۋ ورتالىعى» جۇمىس ىستەيدى. ورتالىقتىڭ نەگىزگى ارتىقشىلىعىنىڭ ءبىرى – جۇيەنىڭ وزگەرىستەرگە بەيىمدەلۋىنە جانە جاڭا اناليتيكالىق تاسىلدەر ەنگىزۋگە مۇمكىندىك بەرەتىن وقىتىلاتىن جاساندى ينتەللەكتىنى پايدالانۋ. بۇل ەلىمىزدەگى ەڭبەك ونىمدىلىگىن ارتتىرۋعا جانە قىزمەتكەرلەرگە قولايلى ەڭبەك جاعدايىن جاساۋعا باعىتتالعان وسىنداي العاشقى جوبا. سونىمەن قاتار اۆتوموبيل زاۋىتىندا لوكاليزاسيانى تەرەڭدەتۋ بويىنشا جۇمىس جۇرگىزىلىپ جاتقانى ايتىلدى. يندۋستريالدى ايماقتا اۋدانى 30 مىڭ شارشى مەتر بولاتىن لوكاليزاسيا ورتالىعىنىڭ قۇرىلىسى جۇرگىزىلۋدە.
كاسىپورىندا تەحنيكالىق كادرلاردى دامىتۋعا ەرەكشە كوڭىل بولىنەدى. وسى ماقساتتا سەحتاردىڭ بارلىعىندا مامانداندىرىلعان وندىرىستىك وقىتۋ ۋچاسكەلەرى ۇيىمداستىرىلدى: بيىلعى 11 ايدا 1،2 مىڭنان استام مامان وقىتىلدى.
پرەمەر-مينيستر ءوندىرىستى كەڭەيتۋ بىلىكتى كادرلاردى دايارلاۋ جانە يندۋستريالىق جوبالاردى ىسكە اسىرۋعا جاستاردى تارتۋ بويىنشا قاتار جۇرگىزىلەتىن جۇمىستارمەن سۇيەمەلدەنۋگە ءتيىس ەكەنىنە توقتالدى. كاسىپتىك-تەحنيكالىق ءبىلىم بەرۋ، سونداي-اق WorldSkills Kazakhstan شەبەرلىك چەمپيوناتىنىڭ الاڭى ءتيىمدى تەتىك بولىپ سانالادى. ولجاس بەكتەنوۆ سونىمەن قاتار كاسىپورىنداردىڭ تيىمدىلىگى مەن شىعارىلاتىن ءونىم كولەمىن ارتتىرۋعا باعىتتالعان سيفرلىق شەشىمدەردى وندىرىستىك پروسەستەرگە ەنگىزۋدىڭ ماڭىزدىلىعىن اتاپ ءوتتى.
