قازاقستاندا كيىكتەردى قورعاۋ ءۇشىن «بوكەيوردا» تابيعي رەزەرۆاتى قۇرىلدى

مەملەكەتتىك تابيعي رەزەرۆاتىنىڭ اۋدانى 343040،1 گەكتاردى قۇرايدى.

ۇكىمەت قاۋلىسىمەن «بوكەيوردا» مەملەكەتتىك تابيعي رەزەرۆاتى جانە اششىوزەك مەملەكەتتىك تابيعي قاۋمالى قۇرىلدى، دەپ حابارلايدى Almaty-akshamy.kz Inbusiness.kz سىلتەمە جاساپ.

«كيىكتەردىڭ اۋىل شارۋاشىلىعىنا تيگىزەتىن زيانىن بارىنشا ازايتۋ جانە  اقبوكەندەردىڭ  ورال پوپۋلياسياسىنىڭ مەكەندەۋ اۋماعىن ساقتاۋ ماقساتىندا باتىس قازاقستان وبلىسىندا «بوكەيوردا» مەملەكەتتىك تابيعي رەزەرۆاتى جانە اششىوزەك مەملەكەتتىك تابيعي قاۋمالى  قۇرىلدى»، - دەپ جازىلعان ەكولوگيا، گەولوگيا جانە تابيعي رەسۋرستار مينيسترلىگىنىڭ رەسمي سايتىندا.

«اششىوزەك» مەملەكەتتىك تابيعي قاۋمالىنىڭ اۋدانى 314504،1 گەكتاردى، «بوكەيوردا» مەملەكەتتىك تابيعي رەزەرۆاتىنىڭ اۋدانى 343040،1 گەكتاردى قۇرايدى.

جوعارىدا اتالعان ەرەكشە قورعالاتىن تابيعي اۋماقتار باتىس قازاقستان وبلىسىنىڭ بوكەيوردا، جانىبەك، كازتالوۆ، جاڭاقالا اۋداندارىنىڭ اۋماعىندا ورنالاسقان.

رەزەرۆات قىزمەتىنە قارجىلىق قولداۋ جانە عىلىمي سۇيەمەلدەۋ كورسەتىلەتىن بولادى.

كيىكتەردىڭ دۇنيەجۇزىلىك تارالىمىنىڭ 90%-دان استامى قازاقستاندا مەكەندەيدى. ولاردىڭ - بەتپاقدالا، ورال جانە ءۇستىرت سەكىلدى ءۇش پوپۋلياسياسى بار.

«بۇگىندە ورال پوپۋلياسياسىنىڭ سانى 801 مىڭ باستى قۇرايدى. بۇل جايىلىمدار مەن سۋاتتار ءۇشىن اۋىل شارۋاشىلىعى جانۋارلارىمەن كيىكتەردىڭ باسەكەلەستىگىنىڭ ارتۋىنا الىپ كەلدى. سونداي-اق، اقبوكەندەر اۋىل شارۋاشىلىعى داقىلدارىن تاپتاپ جاتىر»، - دەپ حابارلايدى مينيسترلىكتەن.