پرەزيدەنت سىرتقى ساۋدا قىزمەتىن جانداندىرۋ جونىندە تاپسىرما بەردى.
پرەزيدەنت قاسىم-جومارت توقايەۆ پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى باقىت سۇلتانوۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
مەملەكەت باسشىسىنا قازاقستاننىڭ دسۇ-عا مۇشە ەلدەر مينيسترلەرىنىڭ 12-كونفەرەنسياسىنا ءتوراعالىعىنىڭ قورىتىندىسى تۋرالى باياندالدى. جيىن بارىسىندا ماڭىزدى شەشىمدەر قابىلدانعان. اتاپ ايتقاندا، دسۇ-نى رەفورمالاۋ ۇدەرىسىن باستاۋعا جانە 20 جىلدان استام ۋاقىتقا سوزىلعان بالىق اۋلاۋ سۋبسيديالارى تۋرالى جاڭا كەلىسىمدى قابىلداۋعا قول جەتكىزىلدى.
قاسىم-جومارت توقايەۆقا مينيسترلىكتىڭ سىرتقى ساۋدانى دامىتۋ جانە ەكونوميكالىق ينتەگراسيا اياسىندا ۇلتتىق مۇددەنى قورعاۋ جۇمىستارىنىڭ ناتيجەسى ۇسىنىلدى.
پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى بيىلعى 4 ايدىڭ ىشىندە شيكىزاتتىق ەمەس تاۋارلار ەكسپورتى بىلتىرعى وسى كەزەڭمەن سالىستىرعاندا 33،9 پايىزعا ارتىپ، 5،6 ميلليارد دوللاردان 7،5 ميلليارد دوللارعا دەيىن وسكەنىن مالىمدەدى. قىزمەت كورسەتۋ ەكسپورتى 5،8 ميلليارد دوللارعا جەتكەن.
مەملەكەت باسشىسىنا ترانسشەكارالىق حابتاردى جانە ساۋدا-لوگيستيكالىق ينفراقۇرىلىمدى وركەندەتۋ، سونىڭ ىشىندە «سولتۇستىك – وڭتۇستىك» كولىك ءدالىزى مەن ترانسكاسپيي حالىقارالىق كولىك باعىتى بويىمەن دامىتۋ جونىندەگى جوبالاردىڭ جۇزەگە اسىرىلۋ بارىسى تۋرالى مالىمەت بەرىلدى.
سونىمەن قاتار باقىت سۇلتانوۆ ۇكىمەتتىڭ نەگىزگى ازىق-تۇلىك تاۋارلارى باعاسىنىڭ تۇراقتىلىعى مەن قولجەتىمدىلىگىن قامتاماسىز ەتۋ شارالارى جونىندە ەسەپ بەردى. ونىڭ ايتۋىنشا، 2022-2024 جىلدارعا ارنالعان ازىق-تۇلىك قاۋىپسىزدىگىن قامتاماسىز ەتۋ جونىندەگى جوسپاردىڭ جۇزەگە اسىرىلۋى 2024 جىلعا قاراي يمپورتقا تاۋەلدى نەگىزگى تاۋارلار بويىنشا حالىقتى ءجۇز پايىز قامتاماسىز ەتۋگە مۇمكىندىك بەرەدى.
كەزدەسۋ سوڭىندا پرەزيدەنت سىرتقى ساۋدا قىزمەتىن جانداندىرۋ جانە شەتەل نارىعىنداعى قازاقستان ونىمدەرىن ىلگەرىلەتۋ جونىندە تاپسىرما بەردى. مەملەكەت باسشىسى ىشكى نارىقتى قامتاماسىز ەتۋ ءۇشىن نەگىزگى ازىق-تۇلىك تاۋارلارى ەكسپورتىن رەتتەۋ قاجەت ەكەنىنە باسا ءمان بەردى.