استانادا باستاۋ العان پيلوتتىق جوبا الماتى، شىمكەنت سىندى ءىرى قالالاردا جالعاسىن تابۋى مۇمكىن.
ەلىمىزدە الاياقتىق ءورشىپ تۇر. قىلمىستىڭ وسى تۇرىمەن كۇرەستى كۇشەيتۋ ءۇشىن كيبەرپوليسيا قىزمەتى ىسكە قوسىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
استانالىق اينۇر ايدىڭ-كۇننىڭ امانىندا قىرۋار قارجىسىنان قاعىلا جازدادى. بويجەتكەن الەۋمەتتىك جەلىدە بريتانيا ازاماتىمەن تانىسقان. ەكى اي بويى ۇزدىكسىز حات جازعان جىگىت ارۋدىڭ سەنىمىنە كىرەدى. قىمبات سىيلىق جىبەرەتىنىن ءجيى ايتادى. الايدا شەتەلدىك جىگىتتىڭ سىيى اينۇردى اۋرە-سارساڭعا سالدى.
«سونىمەن جاقسى سويلەسىپ جۇرەمىز. بىر-ەكى اي سويلەسىپ جۇرگەننەن كەيىن ول كىسى ماعان «مەن ساعان جاقسى سىيلىق جاساعىم كەلەدى" دەگەندى ايتادى. «سىيلىقتىڭ ىشىندە نە سالىپ جىبەردىڭ؟» دەپ سۇرايمىن عوي جاڭاعى جىگىتتەن. سوندا ول: «ايفون، سۋمكي تام، انداي-مىنداي، اكسەسسۋارى» دەيدى. سوسىن ەرتەسىنە ماعان كومپانيا حابارلاسادى. كومپانيا حابارلاسىپ ايتادى: «ءسىزدىڭ اتىڭىزعا سولاي-سولاي، سىيلىعىڭىز كەلدى. سول سىيلىقتى الۋ ءۇشىن 319 500 تەڭگە اقشا تولەۋ كەرەكسىز» دەيدى»، - دەدى استانا تۇرعىنى اينۇر.
قىمبات سىيلىققا قىزىققان قىز جەتپەگەن اقشانى قارىزعا الىپ، 319 500 تەڭگەنى تەرمينالدان اۋدارادى. الايدا ەرتەڭىنە الاياقتار تاعى حابارلاسىپ، قوراپتا قوماقتى اقشا بارىن ايتادى. ەگەر تەزدەتىپ 1،5 ملن تەڭگە سالماسا، زاڭ جۇزىندە جاۋاپقا تارتامىز دەپ قورقىتادى. الدانعانىن تۇسىنگەن بويجەتكەن دەرەۋ پوليسياعا جۇگىرەدى. ونىڭ تابان اقى، ماڭداي تەرىمەن تاپقان اقشاسىن قايتارۋعا ەسىل اۋدانىنىڭ كيبەرپوليسياسى كومەكتەستى. بۇل بولىمشە پيلوتتىق جوبا رەتىندە جىل باسىندا قۇرىلدى. قۇرامىندا تەرگەۋشىلەر، ءىت مامان بار.
«قازىرگى ۋاقىتتا ينتەرنەت زامانىندا ينتەرنەت-الاياقتىق ءبىرىنشى ورىندا تۇر. پيلوتتىق جوبا ازىرگە ەسىل اۋدانىندا ەنگىزىلگەن، الايدا بۇل جوبانى مينيسترىمىزگە كورسەتكەن كەزدە، الماتى، شىمكەنت سياقتى ۇلكەن قالالاردا جالعاستىرۋ تۋرالى نۇسقاۋ بەردى»، - دەيدى استانا قالاسىنىڭ پوليسيا دەپارتامەنتى باستىعىنىڭ ورىنباسارى مۇراتجان شاكەروۆ.
بۇگىنگە دەيىن 234 قىلمىس اشىلدى. ينتەرنەت-الاياقتىق ورشىگەن سوڭعى كەزدە مۇندا جۇگىنەتىندەر سانى ءتىپتى وسكەن. سوندىقتان كيبەرساقشىلار استانانىڭ باسقا دا اۋداندارى تۇرعىندارىنىڭ ارىزىن قاراۋعا ءماجبۇر. شاعىم egov پورتالى ارقىلى نەمەسە كەزەكشى بولىمدە قابىلدانادى. كيبەرپوليسەي بانك جۇمىسىن، ينتەرنەت جەلىسىن جانە كريپتوالەمدى جاقسى ءبىلۋى ءتيىس. كەيىنگى جىلدارى مامان دايىنداۋعا ەرەكشە كوڭىل ءبولىنىپ وتىر. ىشكى ىستەر مينيسترلىگىنىڭ اكادەميالارىندا كيبەرقىلمىستار بويىنشا كافەدرا اشىلدى. قابىرعاسى كەڭەيگەلى وتىرعان بولىمشەنىڭ نەگىزىن وسى كافەدرالاردىڭ تۇلەكتەرى قۇراماق. دەگەنمەن، كەدەرگى دە جوق ەمەس. اسىرەسە، شەتەلدىك قىلمىسكەردى انىقتاۋ قيىن.
«قۇقىقبۇزۋشىلىقتاردىڭ جارتىسىنان كوبى - اقشالاي قاراجاتتار نەمەسە شەتەلدەردىڭ بانك شوتتارىنا كەتەدى، ياعني، بولماسا، كريپتوبيرجا سالاسىنا كەتەدى. كريپتوبيرجا دا، شەتەلدەردىڭ بانك شوتتارى دا ءبىزدىڭ ەلدىڭ زاڭىنا باعىنباعاندىعىنان، وزدەرىنىڭ ارنايى قۇقىقتىق نورمالارى بولعاندىقتان، دەر ۋاقىتىندا جاۋاپ الۋ قيىندىق تۋعىزادى»، - دەيدى قالالىق پوليسيا دەپارتامەنتى تەرگەۋ باسقارماسىنىڭ اعا تەرگەۋشىسى ايات ەستىلەۋوۆ.
ياعني شەكارا اسقان اقشانى قايتارۋ قيامەتتىڭ قىلكوپىرىنەن وتكەندەي. شەتەلدە تىركەلگەن قۇرىلعى تۋرالى مالىمەتتى الۋ ءۇشىن حالىقارالىق قۇرىلىمدارعا شىعۋ كەرەك، ديپلوماتيالىق نوتا جولداۋ قاجەت. نوتانى تەزدەتكەننىڭ وزىندە ءبىر ايدان اسا كۇتەسىز. ال بۇل ۋاقىتتا تالاي ادام الاياقتىڭ ارباۋىنا ءتۇسىپ، سان سوعىپ قالاتىنى ءسوزسىز. كيبەرساقشىلار ينتەرنەت جەلىسىندە اباي بولۋعا شاقىرادى. تاپسىرىس بەرەردە قىزمەت ۇسىنۋشىنىڭ قۇجاتىن سۇراعان ابزال نەمەسە بەينەبايلانىسقا شىققان ءجون. سونداي-اق پاراقشاداعى ەل پىكىرىنە كوڭىل ءبولۋ كەرەك جانە بانك قىزمەتكەرى تەلەفون ارقىلى وپەراسيا جۇرگىزبەيتىنىن ەستەن شىعارماعان ءجون.