بۇل جونىندە ۇكىمەت باسشىسىنىڭ توراعالىعىمەن وتكەن كەڭەستە يندۋستريا جانە ينفراقۇرىلىمدىق دامۋ ۆيسە-مينيسترى ازامات بەيىسبەكوۆ باياندادى.
ازامات بەيىسبەكوۆ 2029 جىلعا قاراي رەسپۋبليكادا 147 مىڭعا جۋىق جۇمىس ورنىن قۇرۋ ارقىلى جالپى سوماسى 33 تريلليون تەڭگەدەن اساتىن 800-دەن استام ينۆەستيسيالىق جوبانى ىسكە قوسۋ جوسپارلانىپ وتىرعانىن ايتتى، دەپ حابارلايدى Almaty-akshamy.kz Egemen.kz-كە سىلتەمە جاساپ.
ونىڭ ىشىندە 22،1 مىڭعا جۋىق جۇمىس ورنىن قۇرۋ ارقىلى جالپى قۇنى 3،1 تريلليون تەڭگەنى قۇرايتىن 122 جوبا قوسىلعان قۇنى جوعارى تاۋارلار شىعارۋعا باعىتتالعان. بۇل – ماشينا جاساۋ، قۇرىلىس يندۋسترياسى، جەڭىل ونەركاسىپ جانە مەتاللۋرگيا سالالارىنداعى جوبالار.
ونىڭ ايتۋىنشا، بۇگىندە ەلىمىز بويىنشا ورتاشا ەسەپپەن كوممۋنالدىق جەلىلەردىڭ 51%-نىڭ توزىعى جەتكەن. بۇل باعىتتا جەرگىلىكتى اتقارۋشى ورگاندار قاجەتتىلىكتەردى ەسكەرە وتىرىپ، كوممۋنالدىق ينفراقۇرىلىمدى سالۋ مەن كۇردەلى جوندەۋدىڭ وڭىرلىك جوسپارلارىن ازىرلەيدى. ءارتۇرلى قارجىلاندىرۋ كوزدەرى ەسەبىنەن 2029 جىلعا قاراي كوممۋنالدىق جەلىلەردىڭ توزۋ دەڭگەيىن 40%-عا دەيىن تومەندەتۋ جوسپارلانۋدا.
سونداي-اق ول بۇگىنگى تاڭدا 4 900 اۋىل سۋمەن جابدىقتاۋ قىزمەتتەرىمەن قامتىلعانىن اتاپ ءوتتى. 2025 جىلدىڭ سوڭىنا دەيىن قالعان 1 395 اۋىلدىڭ ماسەلەسى شەشىلەدى. بۇل سۋمەن قامتاماسىز ەتۋدىڭ ەلىمىز بويىنشا كورسەتكىشىن 100%-عا دەيىن جەتكىزۋگە مۇمكىندىك بەرەدى.
ۆيسە-مينيستر قازىرگى ۋاقىتتا رەسپۋبليكالىق ماڭىزى بار قالالاردا حالىقارالىق تاجىريبەنى ەسكەرە وتىرىپ، عيماراتتاردىڭ سىرتقى كەلبەتىنىڭ ءبىرىڭعاي ساۋلەتتىك ءستيلىن، اۋماقتاردى كوگالداندىرۋ مەن اباتتاندىرۋعا قويىلاتىن تالاپتاردى ساقتاۋدى قامتاماسىز ەتەتىن كەشەندى ديزاين-جوبالاردى ازىرلەۋ باستالعانىن ايتتى.