الماتى مۋزەيىندە گوبەلەنشى، قازاقستاندىق «شەبەر» بايقاۋىنىڭ جەڭىمپازى، ەۋروديزاينەرلەر وداعىنىڭ مۇشەسى، حالىقتىق جانە زاماناۋي قولونەردى ۇشتاستىرا دارىپتەپ جۇرگەن قۇندىز جىلىبايەۆانىڭ «ءورىم» دەپ اتالاتىن كورمەسى اشىلدى. وعان قولونەرشىنىڭ گوبەلەنمەن توقىلعان جيىرمادان استام تۋىندىسى قويىلدى.
«گوبەلەن – اسا كۇردەلى دە كىرپياز، اسقان دالدىكتى، تالعامپازدىقتى، سابىر، شىدامدى تالاپ ەتەتىن بەكزات ونەردىڭ ءبىرى. ءبىراق وسى ونەردى جۇرەك قالاۋىممەن تاڭداعاندىقتان، كەز كەلگەن قيىندىعى مەن شىجىعىنا توزىممەن قارايمىن. ماعان بۇل ونەر ەسەلەپ شابىت سىيلايدى. بىرنەشە بوياۋدى ءبىر تۋىندىنىڭ ءون بويىنان كورەتىن باقىتتى ساتتەرىمدى سوزبەن ورنەكتەپ جەتكىزە الماسپىن»، – دەيدى قۇندىز جىلىبايەۆا.
وسىناۋ قيىن دا قىزىقتى شىعارماشىلىق جولىن نەبارى ءتورت جاسىندا باستاعان گوبەلەنشى قىزدىڭ ۇستازى گوبەلەننىڭ اناسى – ءباتيما زاۋىربەكوۆا. «ۇستازى مىقتىنىڭ – ۇستانىمى مىقتى» دەمەكشى، ونىڭ اسىرەسە، جىپتەرمەن توقىلعان قۇمىرالارى حالىقارالىق بايقاۋلاردا شەتەلدىكتەردى تاڭداي قاقتىرىپ ءجۇر. ونىڭ ابىرويىن اسقاقتاتىپ جۇرگەن دە سول كوزدىڭ جاۋىن ۇرلايتىن، بوياۋلارى قانىق گوبەلەن-قۇمىرالارى. ازىرگە قازاقستاندا مۇنداي گوبەلەندى قۇندىزدان باسقا ەشكىم توقىعان ەمەس.«ءورىم» كورمەسىنە سول قۇمىرالارىمەن بىرگە، «شاشباۋلىم»، «باقىت قۇسى»، «دانالىقپەن كەزدەسۋ» سىندى تانىمال گوبەلەندەرى تۇر.
ءوزىمىزدىڭ ۇلتتىق بولمىسىمىزدى بۇگىنگى كۇنگە زاماناۋي رەڭكپەن جەتكىزىپ جۇرگەن، ونەردى شەكسىز سۇيەتىن قازاق قىزى ءقازىر ەكى باعىتتى قاتار الىپ ءجۇر. بىرەۋى – ابستاركتىلى گوبەلەندەر (تەزىرەك توقىلاتىن)، ال ەكىنشىسى – وتە ۇساق ادىسپەن توقىلاتىن شپالەرا. وسى ەكى باعىتتاعى وزگەشە تۋىندىلارىن كورگىڭىز كەلسە، الماتى مۋزەيىندەگى «ورىمگە» كەلىڭىز. كورمە 5 مامىرعا دەيىن جالعاسادى.
