بىلىكتىلىك جۇيەسىن باسقارۋدىڭ ءۇش دەڭگەيلى مودەلى جاسالدى.
ەلىمىزدە كاسىپتىك بىلىكتىلىك جونىندەگى ۇلتتىق ورگان قۇرىلادى. بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ولجاس وردابايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇلتتىق بىلىكتىلىك جۇيەسىن باسقارۋدىڭ ءۇش دەڭگەيلى مودەلى جاسالدى. ءبىرىنشى دەڭگەي – كاسىپتىك بىلىكتىلىك جونىندەگى ۇلتتىق كەڭەس. ول ۇلتتىق بىلىكتىلىك جۇيەسىنىڭ ستراتەگيالىق باسقارۋىنا جاۋاپ بەرەتىن شەشىمدەر قابىلداۋدىڭ ءبىرىڭعاي ورتالىعىنا اينالادى»، - دەدى ول ماجىلىستە «كاسىپتىك بىلىكتىلىك تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپتىك بىلىكتىلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن تانىستىرا كەلە.
ونىڭ اتاپ وتۋىنشە، ەكىنشى دەڭگەي - مەملەكەتتىك ورگاندار جانىنداعى كاسىپتىك بىلىكتىلىكتەر جونىندەگى سالالىق كەڭەستەر. ولار ءوز سالاسىن كاسىبي بىلىكتى كادرلارمەن قامتاماسىز ەتۋگە جاۋاپ بەرە وتىرىپ، سالالىق بىلىكتىلىك جۇيەلەرىن ورناتۋدا جەتەكشى ءرول اتقاراتىن بولادى.
ءۇشىنشى دەڭگەيدە كاسىپتىك بىلىكتىلىك جونىندەگى ۇلتتىق ورگاندى قۇرۋ كوزدەلەدى. ونىڭ قۇزىرەتىنە ۇلتتىق بىلىكتىلىك جۇيەسى بويىنشا ادىستەمەلىك جانە ساراپتامالىق قولداۋ كورسەتۋ جونىندەگى فۋنكسيالار كىرەدى.