50 ەلدىڭ ازاماتتارى كونسەرتكە بيلەت الىپتى.
23 قىركۇيەكتە الماتى قالاسىندا ءانشى ديماش قۇدايبەرگەننىڭ Stranger اتتى العاشقى جەكە كونسەرتىن بەرەدى، دەپ حابارلايدى Almaty-akshamy.kz Almaty.tv سىلتەمە جاساپ.
«بۇل - مەنىڭ وڭتۇستىك استانادا ۇيىمداستىرىلاتىن العاشقى جەكە شىعارماشىلىق كەشىم. شوۋ قازاقستانداعى ەڭ ءىرى سپورت عيماراتتارىنىڭ ءبىرى - ورتالىق ستاديوندا وتەدى. قۇرمەتتى تىڭدارماندارىممەن تۋعان ەلىمدە قايتا كەزدەسەتىنىمە قۋانىشتىمىن»، – دەدى ديماش قۇدايبەرگەن.
ءقازىر ءانشىنىڭ الماتىنىڭ ورتالىق ستاديونىندا وتەتىن جەكە ءان كەشىنە ارنالعان بيلەتتەردىڭ 90 پايىزى ساتىلىپ كەتكەن. الماتىعا ءانشىنىڭ شەتەلدەگى تىڭدارماندارى دا كوپتەپ كەلىپ جاتىر. قولدا بار دەرەككە قاراعاندا، ءقازىردىڭ وزىندە 21 مىڭنان استام بيلەت ساتىلعان. بۇل – جالپى بيلەت سانىنىڭ 90%. ول تەك كونسەرت وتەتىن ورتالىق ستاديونداعى نەگىزگى ورىن عانا. ودان بولەك فاناتتار ايماعىندا، ياعني ساحنا الدىندا تاعى 10 مىڭعا جۋىق كورەرمەن كونسەرتتى تاماشالاي الادى.
ونلاين بيلەت ساتاتىن كومپانيانىڭ باس ديرەكتورى ۆيكتوريا تورگۋناكوۆانىڭ ايتۋىنشا، بيلەتتىڭ باعاسى 8-10 مىڭ تەڭگەدەن باستالىپ، ساحناعا جاقىن ورىنداردىڭ باعاسى 40 مىڭ تەڭگەگە دەيىن جەتتى.
«ءقازىر فانايماقتا 10 مىڭ تەڭگەلىك جانە قىمبات ورىنداردىڭ بيلەتتەرى عانا بار. بيلەت ساتىلىمعا شىققان كۇننەن بەرى ساتىپ الۋشىلاردىڭ سانى ارتىپ جاتىر. الەمگە تانىمال ونەر يەسىنىڭ شەتەلدىك جانكۇيەرلەرى دە از ەمەس. ساتىلعان بيلەتتەردىڭ 5 مىڭعا جۋىعىن وزگە ەلدىڭ تىڭدارماندارى ساتىپ العان. ششۆەيساريا، فرانسيا، ۋكراينا، جۇڭگو، كاتار، اقش، برازيليا جانە ارگەنتينا سىندى جالپى سانى 50 ەلدىڭ ازاماتتارى كونسەرتكە بيلەت الىپتى. ءتىپتى ءبىرقاتار قوناق ۇيلەردە ءقازىردىڭ وزىندە بوس ورىن قالماعان»، – دەدى ول.
الماتى قالالىق تۋريستىك اقپاراتتىق ورتالىق ديرەكتورىنىڭ ورىنباسارى باۋىرجان پازىلحايىردىڭ ايتۋىنشا، ءانشىنىڭ كونسەرتىنە بيلەتتەر 14 شىلدەدەن باستاپ ساۋداعا شىعارىلعان. العاشقى ەكى تاۋلىكتە 10 مىڭنان اسا بيلەت ساتىلىپتى. سوندىقتان ديماش قۇدايبەرگەننىڭ كونسەرتى كورەرمەننىڭ كوپتىگىمەن رەكورد جاڭارتۋى مۇمكىن.
ديماش قۇدايبەرگەننىڭ جەكە كونسەرتى 23 قىركۇيەك كۇنى كەشكى ساعات 20.00-دە ورتالىق ستانديوندا باستالادى.