بيزنەستەگى ايەلدەردىڭ ۇلەسى 43،3%-دى قۇراعان.
قازاقستاندا ءوز ءىسىن اشىپ، كاسىپكەر اتانعان ايەلدەر سانى ارتىپ كەلەدى، دەپ حابارلايدى Almaty-akshamy.kz Inbusiness.kz سىلتەمە جاساپ.
كاسىپكەر ايەلدەردىڭ ەكونوميكالىق بەلسەندىلىگىن قولداۋ ماقساتىندا 2002 جىلدان باستاپ ايەلدەر كاسىپكەرلىگىن قولداۋ شارالارى جۇزەگە اسىرىلۋدا. وسى ۋاقىت ىشىندە ونداعان مىڭ ايەل وقۋدان ءوتىپ، جەڭىلدەتىلگەن نەسيە الىپ، ءوز بيزنەسىن اشتى.
بۇل تۋرالى اۋىلداعى ايەلدەر كاسىپكەرلىگىن قولداۋ جونىندەگى كونفەرەنسيادا ۇلتتىق ەكونوميكا مينيسترلىگى كاسىپكەرلىكتى مەملەكەتتىك قولداۋ جانە قورعاۋ دەپارتامەنتىنىڭ وكىلى م.يسايەۆا ايتتى.
ماسەلەن، رەسمي ستاتيستيكا دەرەكتەرى بويىنشا، ەگەر 2010 جىلى كاسىپكەر ايەلدەردىڭ سانى نەبارى 73،4 مىڭدى نەمەسە كاسىپكەرلەردىڭ جالپى سانىنىڭ 26%-ىن قۇراسا، 2021 جىلعى 1 قاڭتارداعى جاعداي بويىنشا، كاسىپكەر ايەلدەردىڭ سانى 587،3 مىڭعا جەتتى نەمەسە شوب-تاعى ايەلدەردىڭ ۇلەسى 43،3%-دى قۇرادى.
«ايەلدەر كوبىنە كوتەرمە جانە بولشەك ساۋدادا جۇمىس ىستەيدى. ودان كەيىن جىلجىمايتىن مۇلىك وپەراسيالارى، وڭدەۋ ونەركاسىبى، قارجىلىق جانە ساقتاندىرۋ قىزمەتتەرى، ءبىلىم بەرۋ سالاسى جانە دەنساۋلىق ساقتاۋ مەن الەۋمەتتىك قىزمەتتەردە ەڭبەك ەتەدى»، - دەيدى يسايەۆا.
اۋىل سالاسىنداعى ايەلدەر كاسىپكەرلىگىن دامىتۋدىڭ باسىم باعىتتارىنا اۋىل شارۋاشىلىعى ونىمدەرىن دايىنداۋ، قايتا وڭدەۋ جانە ساقتاۋ، ۆەتەريناريالىق قىزمەتتەر كورسەتۋ، سونداي-اق كيىم، تريكوتاج بۇيىمدارىن ءوندىرۋ، قىزمەت كورسەتۋ سالاسى جانە باسقالار جاتادى.