2020 جىلى ءبىرقاتار پەرسپەكتيۆالىق جوبالار ىسكە اسىرىلادى.
ۇستىمىزدەگى جىلى قازاقستاندا كالاشنيكوۆ اۆتوماتتارى ءوندىرىسىن ىسكە قوسۋ كوزدەلىپ وتىر، دەپ حابارلايدى Almaty-akshamy.kz.
«وتاندىق قورعانىس ونەركاسىبىنىڭ باستى مىندەتتەرىنىڭ ءبىرى - كاسىپورىنداردىڭ تەحنولوگيالىق ينفراقۇرىلىمى مەن كادرلىق الەۋەتىن دامىتۋ. بۇل ەلىمىزدىڭ قارۋلى كۇشتەرىن، باسقا دا اسكەرلەر مەن اسكەري قۇرىلىمداردى قازىرگى زامانعا ساي قارۋ-جاراق پەن اسكەري تەحنيكامەن قامتاماسىز ەتۋ مىندەتىن ورىنداۋعا مۇمكىندىك بەرەدى»،- دەلىنگەن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، بيىل ەلىمىزدىڭ قورعانىس ونەركاسىبى كاسىپورىندارى ءبىرقاتار پەرسپەكتيۆالىق جوبالاردى ىسكە اسىرۋدى جوسپارلاپ وتىر، ونىڭ ىشىندە:
-«№ 405 اۆياجوندەۋ زاۋىتى» اق بازاسىندا مي-171ش تىكۇشاقتارىن قۇراستىرۋ،
-«قازاقستاندىق اۆياسيالىق يندۋستريا» ج ش س كاسىپورنىندا Airbus ۇشاقتارىنا قىزمەت كورسەتەتىن سەرۆيستىك ورتالىق قۇرۋ؛
-«پەتروپاۆل اۋىر ماشينا جاساۋ زاۋىتى» اق بازاسىندا مەملەكەتتىك شەكارانى قورعاۋدىڭ تەحنيكالىق قۇرالدارىن ءوندىرۋ،
-«تىنىس» اق، «الما ءمۇ» ج ش س، «ميليتارم» ج ش س كاسىپورىندارىندا رادياسيالىق جانە حيميالىق قورعاۋ قۇرالدارى ءوندىرىسىن جولعا قويۋ جوسپارلانعان.
-«سەمەي ينجينيرينگ» اق بازاسىندا برونەتانكتىك تەحنيكانى جاڭعىرتۋ؛
-«Steelmanufacturing» ج ش س اۆتوماتتى وق-دارىلەر ءوندىرۋ،
-«قازاقستان پاراماۋنت ينجينيرينگ» جشس-دە «بارىس 8ح8» ساۋىتتى دوڭگەلەكتى ماشينالار ءوندىرىسىن،
-«تىنىس» اق بازاسىندا اك-12 جانە اك-15 اۆتوماتتارى ءوندىرىسىن ىسكە قوسۋ كوزدەلىپ وتىر.
«جالپى العاندا، ەلىمىزدىڭ قورعانىس-ونەركاسىپ كەشەنى قالىپتاسۋ جولىنان ءوتىپ، بۇگىنگى تاڭدا اسكەري سالانى عانا ەمەس، ازاماتتىق سەكتوردى دا ءتۇرلى ونىمدەرمەن قامتاماسىز ەتۋدە»،- دەلىنگەن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.