قازاقستاندا جىلىتۋ ماۋسىمىنا دايىندىق قالاي

يندۋستريا جانە ينفراقۇرىلىم

جاڭا جىلىتۋ كەزەڭىنە بيۋدجەتتىك ۇيىمدار مەن تۇرعىندار ءۇشىن 9،6 ملن توننا كومىر بەرۋ جوسپارلانعان. بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ كوميتەتىنىڭ ءتوراعاسى ءىلياس وسپانوۆ ايتىپ بەردى، دەپ حابارلايدى Almaty-akshamy.kz قازاقپارات-قا سىلتەمە جاساپ.

«كوممۋنالدىق-تۇرمىستىق سەكتور مەن حالىق ءۇشىن نەگىزگى كومىر وندىرۋشىلەر – شۇباركول مەن قاراجىرا بولىپ وتىر. بيىلعى 7 ايدا حالىققا جانە بيۋدجەتتىك ۇيىمدارعا 4،5 ملن توننا كومىر تيەلگەن، بۇل وتكەن جىلعى كەزەڭنەن 10%-عا كوبىرەك. وتكەن جىلى اۋا رايىنىڭ ەرتە سالقىنداۋىنان كەي وڭىرلەردە كومىر ساتىپ الۋعا ۇلكەن كەزەك بولعانى بەلگىلى، بۇل حالىقتىڭ دۇرلىگۋىنە سەبەپ بولدى. بيىل وعان جول بەرمەۋ كەرەك»، - دەدى ءىلياس وسپانوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.

سپيكەردىڭ ايتۋىنشا، وڭىرلەر، سونىڭ ىشىندە تۇرعىنداردىڭ ءوزى كومىر قورىن ۋاقىتىلى ساتىپ الماعانى انىقتالدى. ەكىنشى سەبەپ – سۇرانىستىڭ شامادان تىس كوبەيىپ، جۇكتەمەنىڭ ارتۋى.

«كەلەسى جىلىتۋ كەزەڭىنە (2022-2023 جىلدار) حالىقتى كومىرمەن الدىن الا قامتاماسىز ەتۋگە دايىندىق بيىلعى ناۋرىز ايىندا، وتكەن جىلىتۋ ماۋسىمىنان كەيىن باستالدى. بارلىق تۇرعىنداردى سۋىق تۇسكەنشە كومىر قورىن ساتىپ الۋعا كەڭەس بەرەمىن»، - دەدى ءىلياس وسپانوۆ.

مينيسترلىك الداعى جىلىتۋ كەزەڭىنە بيۋدجەتتىك ۇيىمدار مەن تۇرعىندار ءۇشىن كومىر قاجەتتىلىگى جوسپارىن قۇرعان.

«وسى جوسپارعا سايكەس شامامەن 9،6 ملن توننا كومىر تۇتىنىلادى، ونىڭ ىشىندە كوممۋنالدىق-تۇرمىستىق سەكتورعا – 2،6 ملن توننا، تۇرعىندارعا – 7 ملن توننا كومىر قاراستىرىلعان. تۇرعىنداردان باسقا، بيۋدجەتتىك ۇيىمدار مەن ستراتەگيالىق نىساندار دا سول كومىردى پايدالاناتىنىن ەسكەرۋ قاجەت»، - دەدى كوميتەت ءتوراعاسى.