باعانىڭ وسۋىنە بزجق-داعى جيناق سالىمى «جەتكىلىكتى شەگىنىڭ» وزگەرۋى اسەر ەتەدى
جاقىن ارالىقتا ەلىمىزدەگى باسپانا باعاسى 10-15% قىمباتتايدى. بۇل تۋرالى قازاقستان جىلجىمايتىن مۇلىك فەدەراسياسىنىڭ باسشىسى ەرمەك مۇسىرەپوۆ LS-گە بەرگەن سۇحباتىندا ايتتى، دەپ حابارلايدى Almaty-akshamy.kz.
ونىڭ ايتۋىنشا، باسپانا باعاسىنىڭ بىردەن وسۋىنە 2022 جىلدىڭ 1 قاڭتارىنان باستاپ بزجق-داعى جيناق سالىمى «جەتكىلىكتى شەگىنىڭ» وزگەرۋى اسەر ەتەدى.
«جاڭا شەكتىڭ ەنگىزىلۋىنە 27 كۇن قالدى. وسى كۇندەرى ءبىز زەينەتاقى باعدارلاماسىنا قاتىسىپ جاتقانداردىڭ ۇلكەن دۇربەلەڭى ورىن الادى. ولاردىڭ كوبى زەينەتاقى قورىنداعى قارجىسىن الۋدى كەلەسى جىلعا شەگەرىپ وتىرعاندار. قور «جەتكىلىكتى شەكتى» بۇلاي بىردەن كوتەرىپ جىبەرەدى دەپ ەشكىم ويلامادى. وسىعان بايلانىستى باستاپقى جانە قايتالاما تۇرعىن ۇيلەردىڭ يەلەرى باعا بويىنشا الىپساتارلىق جاسايدى، سونىڭ سالدارىنان باسپانا باعاسى 10-15%-عا وسەدى»،-دەيدى مۇسىرەپوۆ.
ساراپشىنىڭ ايتۋىنشا، باسپانا بويىنشا دۇربەلەڭ ەلىمىزدىڭ بارلىق ايماعىندا ورىن الادى.
«ادامدار جىلجىمايتىن مۇلىكتى الىپ، ونى پايدالاناتىن بولادى. ولار باسپاناعا جەتۋ ءۇشىن جىلداردى كۇتىپ وتىرمايدى، ويتكەنى ەرتەڭ نە بولاتىنىن ەشكىم بىلمەيدى. تۇرعىندار مەگاپوليستەن باسپانا الا الماسا، باعاسى تومەن وزگە ايماقتاردان الا باستايدى»،-دەدى ول.
مۇسىرەپوۆتىڭ ايتۋىنشا، ءۇي باعاسى كەلەسى جىلدىڭ كوكتەمىنە قاراي ءبىراق تۇراقتاۋى مۇمكىن. ويتكەنى ول كەزدە زەينەتاقى قورىنداعى قاراجات جىلجىمايتىن مۇلىككە اسەر ەتۋىن قويادى. سونداي-اق، قورداعى قاراجاتىن پايدالانا الاتىن ادامدار سانى دا ازايادى.
دەگەنمەن، كوكتەمدە جاڭا ترەند پايدا بولۋى دا مۇمكىن، بۇل شارشى مەتردىڭ قۇنىنا دا اسەر ەتەدى.
«ينفلياسياعا بايلانىستى حالىقتىڭ يپوتەكا الۋعا اقشاسى جەتپەي قالۋى مۇمكىن. ولار نەسيەدەن شارشاعاندىقتان جانە كىرىستەر ازايىپ بارا جاتقاندىقتان بۇل پاتەرلەردى نارىققا ۇسىنا باستايدى»،-دەگەن بولجام جاسادى مۇسىرەپوۆ.
ونىڭ ايتۋىنشا، قازاقستاننىڭ جىلجىمايتىن نارىعىن ءدال بولجاۋ مۇمكىن ەمەس، وتە تەز وزگەرىپ وتىرادى. مەملەكەت تاراپىنان قولعا الىنعان جاڭا باستامانىڭ بارلىعى جىلجىمايتىن مۇلىك باعاسىنا اسەر ەتىپ وتىرادى. پاندەميا مەن كارانتين شارالارى الدىمەن جىلجىمايتىن مۇلىك نارىعىن قۇلدىراتقان، كەيىن قالىپىنا كەلتىرىپ، ەندى قايتا قۇلدىراتۋى مۇمكىن.
«باعا ساياساتى وسىلاي بولادى، ازىرگە جىلجىمايتىن مۇلىك نارىعىندا تۇراقتىلىق جوق، ءبىراق ودان ءۇمىتتىمىز»،-دەدى ول.
ايتا كەتسەك، ەلىمىزدە 2022 جىلدان باستاپ زەينەتاقى قورىنداعى الۋعا بولاتىن جيناقتىڭ «جەتكىلىكتى شەگى» كوتەرىلەدى.
بزجق-نىڭ مالىمەتى بويىنشا، 2021 جىلدىڭ 25 قاراشاسىنا دەيىن 516،7 مىڭ ادام زەينەتاقى جيناعىنداعى قارجىسىن باسپانا الۋعا جۇمساعان. ولاردىڭ شوتىنا 2 ترلن تەڭگەدەن استام قارجى اۋدارىلعان. ءبىرجولعى زەينەتاقى تولەمدەرىنىڭ ورتاشا مولشەرى 3،9 ملن تەڭگە بولعان.