جابىرلەنۋشىلەر قىلمىس جاساعان ادامدى ءومىر بويىنا باس بوستاندىعىنان ايىرۋ قاجەت دەگەن پىكىردە
الماتىدا اياجان ەدىلوۆانى ايۋاندىقپەن ءولتىردى دەپ ايىپتالىپ وتىرعان 28 جاستاعى تۇركىستاندىق وزىنە تاعىلعان ايىپتارىمەن ءىشىنارا كەلىسپەي وتىر. سوت پروسەسسىندە ايىپتالۋشى ورىمدەي قىزدى ولتىرگەنىن مويىنداعان. ءبىراق زورلىق كورسەتكەنىن تەرىسكە شىعارىپ الەك، دەپ حابارلايدى Almaty-akshamy.kz «استانا» تەلەارناسىنا سىلتەمە جاساپ.
وسى كوكتەمدە ءىس-تۇسسىز جوعالىپ، كەيىن بولشەكتەلگەن دەنەسى تابىلعان اياجاننىڭ وقيعاسى ەستىگەن ەلدىڭ جاعاسىن ۇستاتقان ەدى. جانتۇرشىگەرلىك قىلمىسقا قاتىستى ەكىنشى سوت وتىرىسى ءوتتى. زورلاۋ دەرەگى بولعاندىقتان پروسەسس جابىق رەجيمدە، ونلاين فورماتتا بولدى.
3 جەلتوقسان كۇنى بەس كۋاگەردەن جاۋاپ الىندى. ولار مارقۇمنىڭ ەكى تۋىسى مەن تانىستارى. جابىرلەنۋشى تاراپتىڭ زاڭدى وكىلىنىڭ ايتۋىنشا، ايىپتالۋشى كىناسىن تولىق مويىنداماعان.
«سوتتالۋشى تورەبەكوۆ ءوزىنىڭ ادام ولتىرگەنى تۋرالى كىناسىن مويىنداپ، ادام زورلانعانى تۋرالى كىناسىن مويىنداماي وتىر. ءبىزدىڭ جابىرلەنۋشى تاراپتان ولتىرۋدەن بولەك، زورلانعان ماسەلەسىن دالەلدەۋ ماسەلەسى تۇر. وسى بارىسىندا ەندى جۇمىس ىستەي باستايمىز»، – دەدى جابىرلەنۋشى تاراپتىڭ زاڭدى وكىلى قادىرجان عالىمجان ۇلى.
جابىرلەنۋشىلەر قىلمىس جاساعان ادامدى ءومىر بويىنا باس بوستاندىعىنان ايىرۋ قاجەت دەگەن پىكىردە. ونىڭ ايىبىن دالەلدەۋ ءۇشىن بارلىق دايەكتەردى ۇسىنامىز دەيدى.
ايتا كەتسەك، اتىشۋلى ءىس 30 تومنان تۇرادى. پروسەستى سۋديا ەركىن مايشىنوۆ قاراۋدا.
ەستەرىڭىزگە سالساق، قاندى قىلمىس بيىل ناۋرىز ايىندا بولدى. جۇمىستان شىعىپ، ءىز-تۇزسىز جوعالعان اياجاننىڭ بولشەكتەلگەن دەنەسى الماتىداعى نۇركەنت ىقشاماۋدانىنداعى پاتەردەن تابىلعان ەدى.