75 مىڭ ادام تۇراقتى جۇمىس ورىندارىنا ورنالاستىرىلدى.
قازاقستان ۇكىمەتى 210 مىڭنان استام جاستىڭ جۇمىسپەن قامتۋدى قولداۋ شارالارىمەن قامتىلعانىن جاريالاپ وتىر، دەپ حابارلايدى Almaty-akshamy.kz.
«2022 جىلعى 1 قازانداعى جاعداي بويىنشا، جۇمىسپەن قامتۋعا جاردەمدەسۋ شارالارىمەن 210 مىڭنان استام جاس قامتىلدى. ونىڭ ىشىندە 75 مىڭ ادام تۇراقتى جۇمىس ورىندارىنا ورنالاستىرىلدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
جۇمىسپەن قامتۋعا جاردەمدەسۋدىڭ نەگىزگى شارالارىنىڭ ىشىندە مىنالاردى ءبولىپ كورسەتۋگە بولادى: جاستار پراكتيكاسى؛ «العاشقى جۇمىس ورنى» جانە «ۇرپاقتار كەلىسىمشارتى» جوبالارى؛ قوعامدىق جۇمىستار؛ «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ، ونىڭ قورىتىندىسى بويىنشا بيزنەس-يدەيانى ىسكە اسىرۋعا گرانت الۋعا بولادى؛ جۇمىس بەرۋشىلەردىڭ وتىنىمدەرى بويىنشا قىسقا مەرزىمدى وقىتۋ.
بۇل جوبالار ماماندىعى بويىنشا تاجىريبەسى جوق، جاقىندا وقۋىن اياقتاعان، سونداي-اق NEET ساناتىنا جاتاتىن 16-28 جاس ارالىعىنداعى جاستارعا ارنالعان.
وسىلايشا، جاستار پراكتيكاسىن ۇيىمداستىرۋ شەڭبەرىندە سوڭعى ءۇش جىل ىشىندە وقۋىن اياقتاعان جوعارى وقۋ ورىندارى مەن كوللەدجدەردىڭ تۇلەكتەرى قاتارىنداعى جۇمىسسىزدارعا قولداۋ كورسەتىلەدى. 2022 جىلى جۇمىسقا ورنالاسقاندار سانى 25،3 مىڭ ادامدى قۇرادى، ونىڭ 44%-ى تۇراقتى جۇمىسقا ورنالاستىرىلدى.
تەك مەكتەپ ءبىلىمى بار نەمەسە جاقىندا ماماندىعى بويىنشا وقۋىن بىتىرگەن جاستار ءۇشىن «العاشقى جۇمىس ورنى» جوباسى بويىنشا جۇمىسقا ورنالاسۋ مۇمكىندىگى بار. «ۇرپاقتار كەلىسىمشارتى» جوباسى زەينەتكەرلىك جاسقا دەيىنگى قىزمەتكەرلەردەن جاس ماماندارعا تاجىريبە مەن ءبىلىم بەرۋدى كوزدەيدى. بۇگىنگى تاڭدا جوعارىدا اتالعان شارالارمەن 3،8 مىڭ جاس قامتىلعان.
30،7 مىڭنان استام جاس قوعامدىق جۇمىسقا ورنالاستىرىلدى.
جاستار اراسىندا كاسىپكەرلىك باستامالاردى دامىتۋ ماقساتىندا 58 مىڭنان استام ادام بيزنەس جۇرگىزۋ داعدىلارىنا يە بولدى، ونىڭ 6 مىڭىنا ءوز ءىسىن باستاۋعا گرانتتار بەرىلدى.
جۇمىس بەرۋشىلەردىڭ سۇرانىسى بويىنشا (وقۋ ورنىندا نەمەسە جۇمىس ورنىندا) قىسقا مەرزىمدى وقۋعا 3،3 مىڭ ادام جىبەرىلدى، ولار وقۋ اقىسى تۇرىندە مەملەكەتتىك قولداۋمەن، سونداي-اق ستيپەنديامەن جانە وقۋ ورنىنا بارىپ كەلۋگە، تۇرۋعا جانە مەديسينالىق تەكسەرۋدەن وتۋگە ماتەريالدىق كومەكپەن قامتاماسىز ەتىلدى. ونىڭ ىشىندە 1220 ادام وقۋدى اياقتادى، ونىڭ 985ء-ى جاڭا ماماندىق بويىنشا تۇراقتى جۇمىسقا ورنالاستىرىلدى.
5 مىڭنان استام جاس Skills.Enbek پورتالىندا ونلاين-وقىتۋدان ءوتۋ ارقىلى قۇزىرەتتىلىكتەرىن ارتتىرىپ، داعدىلاردى يگەردى.
سونىمەن قاتار، Eurasian Resources Group كومپانيالار توبىمەن بىرلەسكەن «جاستاردى جۇمىسقا ورنالاستىرۋ» جوباسى اياسىندا 529 ادام جۇمىسقا ورنالاستىرىلدى.