الماتى اكىمدىگى جولاۋشىلار تاسىمالدايتىن ءۇش كومپانيامەن سوتتاسىپ جاتىر

ءتيىستى شەشىم شىققان سوڭ ماسەلە شەشىلەدى.

الماتى قالاسىنىڭ اكىمدىگى جولاۋشىلاردى تاسىمالدايتىن ءۇش كومپانيامەن سوتتاسىپ جاتىر. بۇل تۋرالى قالا اكىمى ەربولات دوسايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ناۋرىزباي اۋدانىندا وتكەن كەزدەسۋ كەزىندە قالا تۇرعىنى №14 اۆتوبۋس باعىتىنداعى كولىكتىڭ سانى 3-4 بىرلىككە دەيىن قىسقارعانىن، تاڭعى ۋاقىتتا تەك 2 اۆتوبۋس جۇرەتىنىن ايتىپ شاعىمداندى.

«بۇل باعىتتاعى اۆتوبۋس بالالارىمىزدى ۇيدەن مەكتەپكە دەيىن جانە كەرى قاراي جەتكىزەتىن كولىك ەدى»، - دەدى ول.

الماتى قالاسى موبيلدىلىك باسقارماسىنىڭ باستىعى عاني مۇرزاحانوۆتىڭ ايتۋىنشا، №14 باعىتقا قاتىستى ءبىراز ماسەلە بار.

«ول جەكە تاسىمالداۋشى. 18 كولىكتىڭ تەك 4-5ء-ى جولعا شىعادى. الداعى ۋاقىتتا بۇل باعىت بويىنشا وپتيميزاسيا جۇرگىزىلەدى. ءبىز اۆتوبۋستارعا تاپسىرىس بەردىك. ولار 15 كۇن ىشىندە كەلۋى ءتيىس»، - دەدى عاني مۇرزاحانوۆ.

الماتى قالاسىنىڭ اكىمى ەربولات دوسايەۆ بۇگىنگى كۇنى ءۇش تاسىمالداۋشى كومپانيامەن سوتتاسۋ پروسەسى ءجۇرىپ جاتقانىن ايتتى.

«وكىنىشكە وراي، تاسىمالداۋشىلاردىڭ بارلىعى ءوز مىندەتتەرىن ورىنداي بەرمەيدى. سوت تارتىبىمەن ءتيىستى شەشىم شىققان سوڭ، بۇل ماسەلە شەشىلەدى»، - دەدى قالا اكىمى.