قازاقستاندىق اۆياكومپانيالارعا سوت شەشىمىنسىز جولاۋشىلاردى «قارا تىزىمگە» ءوز ەركىمەن ەنگىزۋگە تىيىم سالىنادى.
ازاماتتار بۇل تىزىمگە تەك ۇشاق بورتىنداعى قۇقىقبۇزۋشىلىق ءۇشىن جانە ولاردى قىلمىستىق نەمەسە اكىمشىلىك جاۋاپكەرشىلىككە تارتۋ ناتيجەسىندە كىناسى دالەلدەنگەن جاعدايدا عانا ەنگىزىلەدى، دەپ حابارلايدى Almaty-akshamy.kz
بۇل نورمالار ماجىلىستە ماقۇلدانعان كولىك ماسەلەلەرى جونىندەگى زاڭ جوباسىندا ايقىن كورسەتىلگەن. سونداي-اق، قۇجاتتا «ءادىل مادەنيەت» ۇعىمىن ەنگىزۋ قاراستىرىلعان. ونىڭ نەگىزگى قاعيداتى - ازاماتتىق اۆياسيا سالاسىنداعى قاساقانا قۇقىق بۇزۋشىلىقتارعا نەمەسە نەمقۇرايلى مىنەز-قۇلىققا توزبەۋشىلىك. جاڭا نورمالار اۋە تاسىمالداۋشىلاردىڭ كەسىرىنەن ۇشاقتىڭ ءار ساعاتقا كەشىگۋى ءۇشىن ايىپپۇل سالۋدى قاراستىرادى. سونىمەن قاتار، ەگەر اۆياكومپانيالار رەيستى بۇرىنعىداي 10 ەمەس، 8 ساعاتقا كەشىكتىرەتىن بولسا، جولاۋشىلاردى قوناق ءۇي جانە تاماقپەن قامتاماسىز ەتۋى ءتيىس.
"دەپۋتاتتار ۇسىنعان نورما بەكىتىلگەن. ەگەر اۆياكومپانيانىڭ كەسىرىنەن رەيستىڭ كەشىگۋى ورىن السا، وندا ولار جاۋاپتى بولادى. سەبەبى بىزدە اۆياكومپانيالارىمىز وسىنداي قاتەلىكتەرگە بوي بەرىپ جاتادى. بۇل قالاي جۇزەگە اسادى؟ رەيستىڭ كەشىككەن ءار ساعاتىنا 3 پروسەنت ايىپپۇل قوسىلادى، ءبىراق ايىپپۇل قۇنى تۇپتەپ كەلگەندە بيلەت باعاسىنان ارتىق بولمايدى. مەحانيزم وزىنەن-وزى جۇمىس ىستەي بەرەدى. مىسالى، ءسىز بيلەتتى 20 مىڭعا ساتىپ الدىڭىز دەلىك، ءار ساعات ءۇشىن 3 پايىز، ياعني 20 مىڭ تەڭگەدەن پايىزدار الىنىپ وتىرادى"، - دەدى ق ر ەكونوميكالىق رەفورمالار جانە وڭىرلىك دامۋ كوميتەتىنىڭ ءتوراعاسى البەرت راۋ.
ايتا كەتەيىك، ەنگىزىلگەن تۇزەتۋلەرگە سايكەس، قازاقستاندا جولاۋشىلار تاسىمالىنىڭ قاۋىپسىزدىگى ترانسپورتتىڭ بارلىق تۇرىنە كۇشەيتىلەدى.