پايدالانىلماي جاتقان جەرلەردىڭ 90%-عا جۋىعى شاعىن كاسىپكەرلىك سۋبەكتىسىنە تيەسىلى.
2022 جىلى قازاقستاندا اۋىل شارۋاشىلىعى جەرلەرىن پايدالانباي جاتقان 1901 شاعىن كاسىپكەرلىك سۋبەكتىسى تەكسەرىلەدى، دەپ حابارلايدى Almaty-akshamy.kz اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
ەسكە سالا كەتەيىك، 2022 جىلدىڭ 3 قاڭتارىندا پايدالانىلمايتىن اۋىل شارۋاشىلىعى جەرلەرىن ماجبۇرلەپ الىپ قويۋ مەرزىمىن قاتارىنان 2 جىلدان 1 جىلعا دەيىن قىسقارتۋدى جانە مەملەكەتتىك باقىلاۋدىڭ جاڭا تەتىگىن ەنگىزۋدى كوزدەيتىن نورما قابىلدانعان بولاتىن. بۇل رەتتە پايدالانىلماي جاتقان جەرلەردىڭ 90%-عا جۋىعى شاعىن كاسىپكەرلىك سۋبەكتىسىنە تيەسىلى.
«ەرەكشە جاعدايلاردى قوسپاعاندا، پرەزيدەنتتىڭ شاعىن جانە ميكروكاسىپكەرلىك سۋبەكتىلەرىنە قاتىستى تەكسەرۋلەرگە موراتوريي ەنگىزۋ تۋرالى جارلىعىن بۇزا وتىرىپ، تەكسەرۋلەر جۇرگىزۋ مۇمكىن ەمەس. وسىعان بايلانىستى اۋىل شارۋاشىلىعى مينيسترلىگىنىڭ 2021 جىلعى 26 شىلدەدەگى بۇيرىعىمەن «جاپپاي قاتەر» ۇعىمىن ايقىنداۋ جونىندەگى ۇسىنىمدار بەكىتىلدى. اۋىل شارۋاشىلىعى مينيسترلىگىنىڭ 2022 جىلعى 4 مامىرداعى № 139 بۇيرىعىنا سايكەس، «جاپپاي قاتەر» شەڭبەرىندە جالپى الاڭى 5،8 ميلليون گەكتاردى قۇرايتىن 1901 شاعىن كاسىپكەرلىك سۋبەكتىلەرىنە قاتىستى جوسپاردان تىس تەكسەرۋلەر جۇرگىزۋ جوسپارلانۋدا»، - دەدى اۋىل شارۋاشىلىعى ۆيسە-مينيسترى ءابىلحايىر تامابەك.
بۇعان قوسا، ول جەر پايدالانۋشىلاردى ەكونوميكالىق ماجبۇرلەۋگە جاعداي جاساۋ ءۇشىن پايدالانىلمايتىن اۋىل شارۋاشىلىعى جەرلەرىنە سالىق مولشەرلەمەلەرى 10-نان 20 ەسەگە دەيىن ۇلعايتىلعانىن ايتتى.
«تاجىريبە كورسەتكەندەي، وسىنداي ىس-ارەكەتتەر ناتيجەسىندە جەر پايدالانۋشىلار ۇلعايتىلعان سالىقتى تولەمەۋ ءۇشىن، جەرلەردى ءوز ەركىمەن قايتارىپ جاتادى. جوعارىدا اتالعان ءىس-شارالار ناتيجەسىندە، وتكەن جىلمەن سالىستىرعاندا، بيىل 5 ميلليون گەكتار پايدالانىلمايتىن اۋىل شارۋاشىلىعى جەرلەرىن مەملەكەتتىك مەنشىككە قايتارۋدى جوسپارلاپ وتىرمىز. بۇل رەتتە پايدالانىلمايتىن جانە زاڭ بۇزۋشىلىقپەن بەرىلگەن جەرلەردى الىپ قويۋ ءبىر كۇندە بىتەتىن جۇمىس ەمەس ەكەنىن اتاپ وتكىم كەلەدى. سەبەبى كونستيتۋسيانىڭ جانە ازاماتتىق كودەكستىڭ نورمالارىنا سايكەس، مەنشىك قۇقىعى قورعالعان. ال الىپ قويۋ پروسەسى تەك سوت ارقىلى جۇزەگە اسىرىلادى»، - دەپ تولىقتىردى سپيكەر.
قازىرگى ۋاقىتتا وبلىستاردا ءاربىر وڭىردەگى بارلىق مۇددەلى قۇقىق قورعاۋ جانە مەملەكەتتىك ورگانداردىڭ قىزمەتكەرلەرىن تارتا وتىرىپ، ۆەدومستۆوارالىق توپتار قۇرۋ بويىنشا جۇمىستار جۇرگىزىلىپ جاتىر.
اۋىل شارۋاشىلىعى ماقساتىنداعى جەرلەردى ۇتىمدى پايدالانۋ جانە حالىقتى اۋىلدارداعى اۋىل شارۋاشىلىعى جەرلەرىمەن قامتاماسىز ەتۋ پروبلەماسى بارلىق وڭىردەگى وتكىر ماسەلە بولىپ وتىر.
ازاماتتاردىڭ ءوتىنىشى بويىنشا وتكەن جىلى رەسپۋبليكادا جەر زاڭناماسىن ساقتاۋ بويىنشا 175 جوسپاردان تىس تەكسەرۋ جۇرگىزىلىپ، كىنالى لاۋازىمدى تۇلعالارعا قاتىستى جالپى سوماسى 875،1 مىڭ تەڭگەگە 55 اكىمشىلىك ءوندىرىس قوزعالدى.