باعدارلاما حالىقتىڭ كوپشىلىگىنە قولجەتىمدى بولۋى ءۇشىن جاسالعان.
24 قاڭتاردا يندۋستريا جانە ينفراقۇرىلىمدىق دامۋ ءمينيسترى مارات قارابايەۆ ۇكىمەت وتىرىسىندا قازاقستاندا جەڭىلدەتىلگەن اۆتونەسيە بەرۋ تەتىگىن قايتا قاراۋ جوسپارى تۋرالى ايتتى، دەپ حابارلايدى Almaty-akshamy.kz
مارات قارابايەۆ جەڭىلدەتىلگەن اۆتوكولىك نەسيەسى ءۇشىن بەرىلەتىن نەسيە سوماسى 10 ميلليون تەڭگەگە دەيىن، ال كولىك قۇنى 15 ميلليون تەڭگەدەن اسپاۋى كەرەكتىگىن ەسكە سالدى. ونىڭ ايتۋىنشا، مۇنداي پارامەترلەر باعدارلاما حالىقتىڭ كوپشىلىگىنە قولجەتىمدى بولۋى ءۇشىن جاسالعان.
«ايدىڭ سوڭىنا دەيىن باعدارلامانى ىسكە قوسۋعا تىرىسامىز» دەپ ايتىپ جاتىرمىز»، - دەدى مارات قارابايەۆ.
ونىڭ ايتۋىنشا، وسى اپتادا يندۋستريالىق دامۋ قورى بريفينگ وتكىزىپ، ودان كەيىن مەرزىمدەرى مەن شارتتارى بەلگىلى بولادى.
«بۇل جەردە ماسەلە تۇتاستاي العاندا باعدارلامانىڭ مەحانيزمىن قايتا قاراۋ تۋرالى بولىپ وتىر، ەگەر بۇعان دەيىن ولار اۆتوسالوندارعا جۇگىنىپ، سودان كەيىن عانا بانككە بارسا، ەندى «يندۋستريالىق دامۋ قورى» اق باسقا مەحانيزمدى ۇسىنادى: الدىمەن ءوتىنىش بەرۋ ءۇشىن قورعا ەلەكتروندى كەزەك پايدا بولادى، سودان كەيىن اۆتوسالوندار وزدەرىمەن كەلىسىلگەن بەلگىلى ءبىر مەرزىمدە اۆتوكولىكتى بەرە الادى»، دەدى ق ر يندۋستريا جانە يندۋستريالىق-يننوۆاسيالىق دامۋ مينيسترلىگىنىڭ باسشىسى.
بۇل رەتتە ول تەك قازاقستاندا عانا ەمەس، الەمنىڭ كوپتەگەن ەلدەرىندە ادامدار كولىكتى ۇزاق كۇتۋ ماسەلەسىمەن بەتپە-بەت كەلەتىنىن ايتتى.
2022 جىلدىڭ مامىر ايىندا باعدارلاماعا 100 ملرد تەڭگە ءبولىندى. 1 جەلتوقسانداعى جاعداي بويىنشا، بۇل اقشاعا 14 مىڭنان استام نەسيە ماقۇلداندى، ونىڭ ىشىندە 12 500-دەن استام جاڭا اۆتوكولىكتەر شىعارىلدى. اۆتونەسيەنىڭ ورتاشا مولشەرى 7،8 ملن تەڭگەنى قۇرادى.
2022 جىلدىڭ سوڭىندا جەڭىلدەتىلگەن اۆتونەسيەلەردى 2023 جىلدىڭ قاڭتارىندا ىسكە قوسۋ جوسپارى جاريالاندى.