بۇل ناۋقان بالالاردىڭ قاتىسۋىمەن بولاتىن وقىس وقيعالاردىڭ الدىن الۋعا باعىتتالعان.
2025 جىلدىڭ 20 ناۋرىزى مەن 23 مامىرى ارالىعىندا ەلىمىزدىڭ بارلىق بالاباقشالارىندا، مەكتەپتەرىندە جانە كوللەدجدەرىندە بالالاردىڭ قاۋىپسىزدىگىن قامتاماسىز ەتۋگە باعىتتالعان رەسپۋبليكالىق اقپاراتتىق كامپانيا وتەدى، دەپ حابارلايدى aqshamnews.kz.
قاۋىپسىزدىك شارالارىن كۇشەيتۋ جانە بالالاردىڭ جاراقاتتانۋىنىڭ الدىن الۋ ماقساتىندا ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى بارلىق ءبىلىم بەرۋ ۇيىمدارىندا اتا-انالار جينالىسىنىڭ ءبىرىڭعاي كۇنىن وتكىزۋ تۋرالى جەرگىلىكتى اتقارۋشى ورگاندارعا ءتيىستى حاتتار جولدادى. اتا-انالارمەن كەزدەسۋدىڭ نەگىزگى تاقىرىبى سۋ ايدىندارىنداعى قاۋىپسىزدىك ەرەجەلەرى مەن بالالاردىڭ تەرەزەدەن قۇلاۋ جاعدايلارىنىڭ الدىن الۋ ماسەلەلەرى بولماق.
جينالىس بارىسىندا اتا-انالارعا ارنايى جادىنامالار مەن ادىستەمەلىك ۇسىنىمدار بەرىلەدى. سونىمەن قاتار، بالالاردىڭ جاراقات الۋىنا اكەلەتىن نەگىزگى سەبەپتەر – ەرەسەكتەر تاراپىنان باقىلاۋدىڭ جەتكىلىكسىزدىگى، رۇقسات ەتىلمەگەن ورىنداردا شومىلۋ جانە قاۋىپسىزدىك شارالارىنىڭ ساقتالماۋى جان-جاقتى تالقىلانادى. وسىعان بايلانىستى بالالاردىڭ ۇيدە، مەكتەپتە جانە كوشەدە قاۋىپسىزدىگىن قامتاماسىز ەتۋگە باعىتتالعان الدىن الۋ شارالارى ۇسىنىلادى.
پروفيلاكتيكالىق جۇمىستار ەڭبەك ۇجىمدارى دەڭگەيىندە دە ۇيىمداستىرىلىپ، وعان پەداگوگتەر، ءبىلىم بەرۋ ۇيىمدارىنىڭ وكىلدەرى، جەرگىلىكتى اتقارۋشى ورگاندار مەن بالالاردىڭ قۇقىقتارىن قورعاۋ سالاسىنداعى ساراپشىلار قاتىسادى.
«كوكتەمگى جىلى كۇندەرمەن بىرگە بالالاردىڭ بەلسەندىلىگى دە ارتادى. وكىنىشكە قاراي، وسى كەزەڭدە ءتۇرلى جازاتايىم وقيعالار جيىلەپ كەتەدى. بالالاردىڭ قاۋىپسىزدىگى – ءبىزدىڭ ورتاق مىندەتىمىز. بارلىق اتا-انالاردى ساقتىق شارالارىن كۇشەيتۋگە، بالالارعا قاۋىپسىزدىك ەرەجەلەرىن تۇسىندىرۋگە جانە ولاردى قاراۋسىز قالدىرماۋعا شاقىرامىن»، – دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
كامپانيا اياسىندا «ءقاۋىپسىز تەرەزە» اكسياسى دا وتكىزىلەدى. ونىڭ باستى ماقساتى – اتا-انالار مەن قوعامنىڭ نازارىن ۇيدەگى قاۋىپسىزدىك ماسەلەلەرىنە اۋدارىپ، الدىن الۋ شارالارى تۋرالى اقپارات بەرۋ.
ايتا كەتەيىك، 2024 جىلدان باستاپ زاڭناماعا ەنگىزىلگەن وزگەرىستەرگە سايكەس، بارلىق قۇرىلىس كومپانيالارى جاڭا كوپقاباتتى تۇرعىن ۇيلەردە تەرەزەلەرگە قورعانىش قۇلىپتارىن ورناتۋعا مىندەتتەلدى. بۇل تالاپ وتكەن جىلدان باستاپ پايدالانۋعا بەرىلگەن بارلىق تۇرعىن ۇيلەرگە قولدانىلادى جانە بالالاردىڭ قاۋىپسىزدىگىن قامتاماسىز ەتۋ جونىندەگى كەشەندى مەملەكەتتىك شارالاردىڭ ءبىرى بولىپ تابىلادى.