مامانداردىڭ ايتۋىنشا، قازىرگى تاڭدا قازاقستاندا ەنەرگيا تاپشىلىعى بار جانە الداعى 5 جىل ىشىندە بۇل تاپشىلىقتىڭ كولەمى 13 ميلليارد كيلوۆاتت ساعاتقا جەتۋى مۇمكىن. تىعىرىقتان شىعۋدىڭ ەڭ ءتيىمدى جولى — اتوم ەلەكتر ستانسياسىن (اەس) سالۋ.
ءبىر عانا اەس كۇننەن، جەلدەن جانە سۋدان الاتىن قۋات كوزدەرىنە قاراعاندا بىرنەشە ەسەگە ارتىق ەنەرگيا وندىرەدى، بۇل ونىڭ تيىمدىلىگىن دالەلدەيدى، دەپ حابارلايدى aqshamnews.kz.
قازاقستاندا قۋات كوزدەرى توزىپ تۇر. قولدانىستاعى ەلەكتر ستانسيالارىنىڭ 60%-ى ەسكىرگەن جانە جىل وتكەن سايىن ولاردىڭ ەنەرگيا ءوندىرۋ مۇمكىندىگى دە ازايۋدا. سونىمەن قاتار، كومىر ەلەكتر ستانسيالارىنىڭ ەكولوگياعا كەلتىرەتىن زيانى وراسان زور. مىسالى، تاۋلىگىنە 20 مىڭ توننا كومىر جاعىلعان كەزدە اۋاعا 140 تونناعا دەيىن شاڭ-توزاڭ جانە 200 توننا ازوت وكسيدى تارايدى. بۇل جاعداي قورشاعان ورتاعا جانە حالىقتىڭ دەنساۋلىعىنا كەرى اسەرىن تيگىزەدى.
قازاقستاندا جاڭارتىلاتىن ەنەرگيا كوزدەرىنىڭ ۇلەسى نەبارى 6%-دى قۇرايدى. كۇن جانە جەل ستانسيالارى بار بولعانى 2900 مەگاۆاتت قۋات وندىرەدى، بۇل جالپى قاجەتتىلىكتى تولىق قامتاماسىز ەتۋگە جەتكىلىكسىز.
اەس تەك ەنەرگيا تاپشىلىعىن شەشۋدىڭ عانا ەمەس، سونىمەن قاتار، ەكولوگياعا زيان كەلتىرمەيتىن تازا ەنەرگيا كوزى بولىپ تابىلادى. ونىڭ جوعارى قۋاتتىلىعى مەن تۇراقتىلىعى ەلىمىزدىڭ ەنەرگەتيكالىق قاۋىپسىزدىگىن نىعايتۋعا جانە تۇراقتى دامۋىنا سەپتىگىن تيگىزەدى. قازاقستان ءۇشىن اەس سالۋ — ەنەرگەتيكالىق تاۋەلسىزدىككە قول جەتكىزۋدىڭ جانە ەكونوميكالىق تۇراقتىلىقتى قامتاماسىز ەتۋدىڭ ماڭىزدى قادامى.