ينتەرنەت پەن تەلەفون ارقىلى الاياقتىق كوبەيۋىنە بايلانىستى جالعان نومىرلەر بۇعاتتالادى.
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين الەۋمەتتىك جەلىدەگى پاراقشاسىندا جازدى، دەپ حابارلايدى Almaty-akshamy.kz.
باعدات مۋسين ىشكى ىستەر ءمينيسترى مارات احمەتجانوۆپەن بىرلەسە وتكەن كەڭەستە ينتەرنەت-الاياقتىققا قارسى ءىس-قيمىل ماسەلەلەرىن تالقىلاعانىن مالىمدەدى.
«ءبىز قازىرگى ۋاقىتتا بايلانىس وپەراتورلارىمەن بىرگە وسى ماسەلەگە قاتىستى بىرلەسكەن ءىس-شارالاردى جۇزەگە اسىرۋدامىز. بۇگىنگى تاڭدا الاياقتارمەن كۇرەسۋدىڭ ءتيىمدى ادىستەرىنىڭ ءبىرى - جالعان نومىرلەردى بۇعاتتاۋ. قىركۇيەك ايىنىڭ سوڭىنا دەيىن بايلانىس وپەراتورلارى الاياقتار قوڭىراۋ شالاتىن جالعان تەلەفون نومىرلەرىن انىقتاپ، بۇعاتتايتىن بولادى. سيفرلىق دامۋ مينيسترلىگى ازاماتتاردىڭ قاۋىپسىزدىگىن ەسكەرە وتىرىپ، ۇيالى نومىرلەردى تىركەۋ كەزىندە بيومەتريالىق سايكەستەندىرۋ جۇيەسىن ەنگىزۋدى قاراستىرۋدا. وسىلايشا، ءبىز تەلەفون نومىرلەرىنىڭ بوتەن ادامدارعا تىركەلۋ جاعدايلارىنىڭ الدىن العىمىز كەلەدى»، - دەدى باعدات مۋسين.
سونىمەن قوسا، ۆەدومستۆو ينتەرنەت-الاياقتىققا قارسى ءاقپاراتتىق-تۇسىندىرۋ باعىتىندا بانكتەرمەن تىعىز ارەكەت جاساۋدى ۇسىنادى.
«ويتكەنى الاياقتىق فاكتىلەردىڭ ورىن الۋى كوپ جاعدايدا بانك وپەراسيالارىمەن تىكەلەي بايلانىستى. بانك قىزمەتكەرلەرى تۇرعىندارعا حابارلاسقان ۋاقىتتا، ونىڭ شىنىمەندە بانكتەن حابارلاسىپ تۇرعانىنا كوز جەتكىزۋ ءۇشىن SMS-حابارلامالار ارقىلى سايكەستەندىرۋ جۇيەسىن ەنگىزۋگە بولادى»، - دەدى مينيستر.