بىلتىر ەلدىڭ كورىكتى جەرلەرىن جەتى ميلليونعا جۋىق قازاقستاندىق تاماشالادى.
بۇل 2020 جىلعى سايكەس مەرزىمدەگى كورسەتكىشتەن 35% ارتىق. ال جاھاندىق پاندەمياعا دەيىنگى كەزەڭمەن سالىستىرعاندا 5% كوبىرەك، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
بۇل تۋرالى «قازاق تۋريزم» ۇلتتىق كومپانياسىنىڭ وكىلى ەرنۇر كەنجەبەكوۆ مالىمدەدى. ونىڭ ايتۋىنشا، ەل ىشىندەگى ساياحاتشىلار اعىننىڭ ءوسۋى ەڭ الدىمەن، تۇرعىنداردىڭ ءوزىمىزدىڭ ۇلتتىق پاركتەرگە دەگەن قىزىعۋشىلىعى ارتا تۇسكەنىن بىلدىرەدى.
«وتكەن جىلدارعا قاتىستى ايتار بولساق، ۇلتتىق پاركتەردە ادامداردىڭ كەلۋى بويىنشا رەكورد ورنادى. ادامداردىڭ تابيعاتى اسەم جەرلەرگە بارۋ بەلسەندىلىگى ارتىپ كەلەدى. اسىرەسە، سۇرانىسقا يە تۋريستىك باعىتتار الماتىنىڭ تاۋ بوكتەرلەرىندە، بۋراباي، باياناۋىل، كوكشەتاۋ جانە قارقارالى ايماقتارىندا ورنالاسقان. ونداعى ۇلتتىق پاركتەرگە بىلتىر ادامدار ءجيى ساپار شەگىپ، ساياحاتشىلار شوعىرى كوبەيگەن. ماڭعىستاۋ مەن تۇركىستان قالالىق ءتۋريزمى دە قارقىندى دامىپ بارادى»، - دەدى «Kazakh Tourism» ۇك اق وكىلى ەرنۇر كەنجەبەكوۆ.
مامان سوزىنشە، سوڭعى كەزدەرى وتاندىق ساياحاتشىلاردىڭ دەنى قازاقستاننىڭ جاڭا قۇرىلعان ءۇش وڭىرىندە ورنالاسقان كورىكتى مەكەندەردى ارالاپ، سەرۋەن قۇرعاندى ءجون كورەدى.
«وسى باعىتتار بويىنشا دايىن تۋريستىك ونىمدەر بار. مىسالى، اباي وبلىسىنداعى سەمەي قالاسىندا ۇلى اقىننىڭ تۋعان جەرىنە بارىپ، جولشىباي تاعى دا ءبىرقاتار تۋريستىك نىساندارعا سوعىپ كەتۋگە بولادى. كەيىن قوڭىر اۋليە ۇڭگىرى سىندى كيەلى مەكەندەرگە ايالداۋ قاراستىرىلعان. ياعني مۇنداعى تۋريستىك نىساندارعا سۇرانىس ارتىپ كەلەدى. ول جەرلەرگە ءوزىڭىز نەمەسە تۋروپەراتورلار ارقىلى باعىتتار قۇرىپ بارۋعا بولادى. ولاردا كيدس گوۋ فري سياقتى مەملەكەتتىك قولداۋ شاراسى قولدانىلادى. ول دەمالىستا وتباسىمەن ساياحاتتاۋعا جانە بالالار اۋە بيلەتتەرىن ۇنەمدەۋگە مۇمكىندىك بەرەدى»، - دەيدى «Kazakh Tourism» ۇك اق وكىلى ەرنۇر كەنجەبەكوۆ.
ايتا كەتەيىك، اتالعان باعدارلاما قازاقستاندا بيىل ىسكە قوسىلدى. بۇل ەكى جاستان 14 جاسقا دەيىنگى بالالارعا ەلدىڭ نەگىزگى اۋە باعىتتارىنا تەگىن ۇشۋعا مۇمكىندىك بەرەدى. بۇعان دەيىن «قازاق ءتۋريزمى» حابارلاعانداي، باعدارلامانى ەنگىزۋ قازاقستاندىقتاردىڭ دەمالىس شىعىنىن ورتاشا ەسەپپەن 30% ۇنەمدەۋگە مۇمكىندىك بەرەدى.