ەلدەگى ۆەدومستۆولىق دەڭگەيدەگى ماراپاتتاردىڭ قاتارى «ەڭبەك سىڭىرگەن ساۋدا قىزمەتكەرى» توسبەلگىسىمەن تولىعۋى مۇمكىن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اشىق نقا» پورتالىندا جاريالانعان ق ر ۇكىمەتىنىڭ قاۋلىسىندا وسىنداي شارا كوزدەلگەن. قۇجاتتىڭ تولىق اتاۋى – «قازاقستان رەسپۋبليكاسى ۇكىمەتىنىڭ قۇرىلىمىنا كىرەتىن كەيبىر مەملەكەتتىك ورگانداردىڭ ۆەدومستۆولىق ناگرادالارى تۋرالى «قازاقستان رەسپۋبليكاسى ۇكىمەتىنىڭ 2011 جىلعى 15 جەلتوقسانداعى №1539 قاۋلىسىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى ۇكىمەتىنىڭ قاۋلى جوباسى.
«3. ۆەدومستۆولىق ناگرادالارمەن ماراپاتتاۋ نەگىزدەرى» ءبولىمى: مىناداي مازمۇنداعى «ەڭبەك سىڭىرگەن ساۋدا قىزمەتكەرى» توسبەلگىسى» دەگەن كىشى بولىممەن جانە 82-4-تارماقپەن تولىقتىرىلسىن»، - دەپ جازىلعان قاۋلى جوباسىندا.
سونداي-اق، بۇل توسبەلگىمەن ساۋدانى دامىتۋعا، ساۋدا قىزمەتىن جۇزەگە اسىرۋدىڭ نىساندارى مەن ادىستەرىن جەتىلدىرۋگە، تۇتىنۋشىلارعا قىزمەت كورسەتۋدىڭ جوعارى مادەنيەتىن قامتاماسىز ەتۋگە سىڭىرگەن ەڭبەگى جانە قوسقان زور ۇلەسى ءۇشىن، ساۋدانىڭ تيىمدىلىگى مەن جوعارى تەحنولوگيالىق سيپاتىن ارتتىرۋعا، وزىق تاجىريبەنى تاراتۋعا باعىتتالعان ءىس-شارالاردى ازىرلەگەنى جانە جۇزەگە اسىرعانى ءۇشىن، سونداي-اق قوعامدىق تاماقتانۋ سالاسىندا جۇمىس ىستەيتىن قىزمەتكەرلەر ناگرادتالاتىنى ايتىلعان.
«ەڭبەك سىڭىرگەن ساۋدا قىزمەتكەرى» توسبەلگىسى ديامەترى 45 مم شەڭبەر نىسانىندا جەزدەن دايىندالادى. مەدالدىڭ بەت جاعىندا ورتادا بەدەرلى، شىعىڭقى، جىلتىر ەلەمەنت – «كادۋكۋس» ساۋداسىنىڭ سيمۆولى ورنالاسقان. اينالدىرا تومەنگى بولىگىندە «ەڭبەك سىڭىرگەن ساۋدا قىزمەتكەرى» كۇرەڭ قىزىل ەمالمەن ناقىشتالعان، گراۆيروۆكانىڭ سىرتقى بولىگىندە مەملەكەتتىك تۋدىڭ ءتۇسى – كوگىلدىر ەمال كومكەرىلگەن. شەڭبەردىڭ سىرتقى بولىگىن جىلتىر، شىعىڭقى بەدەر نىسانىندا ورىندالعان سەگىزبۇرىش كومكەرەدى. توسبەلگىنىڭ سىرتقى جاعىندا جوعارعى بولىگىندە قازاق ويۋ-ورنەگى ورنالاسقان، ورتاسىندا «قازاقستان رەسپۋبليكاسىنىڭ ساۋدا جانە ينتەگراسيا مينيسترلىگى» دەگەن قازاقشا سوزدەر جانە تومەنگى بولىگىندە سەريالىق ءنومىر ويىلىپ جازىلعان. توسبەلگى قۇلاقشا مەن شىعىرشىق ارقىلى ەنى 35 مم جانە بيىكتىگى 31 مم كوگىلدىر ءتۇستى قاتقىل جىبەك لەنتامەن قاپتالعان ءتورت بۇرىشتى تاعانعا جالعانادى، كيىمگە ۆيزورلى بەكىتكىشى بار تۇيرەۋىش ارقىلى بەكىتىلەدى»، - دەپ جازىلعان قۇجاتتا.
قاۋلى جوباسى 3 مامىرعا دەيىن جاريا تالقىلاۋدا بولادى.