جەكە پايدالانۋ ءۇشىن بەلگىسىز بىرەۋدەن ەسىرتكى ساتىپ العان ەر ادام ۇستالدى
الدىن الا بولجام بويىنشا، الماتى قالاسىنىڭ 45 جاستاعى تۇرعىنىنان گاشيشقا ۇقساس وسىمدىك تەكتەس جاسىل ءتۇستى ۇنتاق زاتى بار 11 بۋما تاركىلەندى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«تاۋگۇل ىقشام اۋدانىنداعى ۇيلەردىڭ ءبىرىنىڭ اۋلاسىندا ۋچاسكەلىك ينسپەكتور قۇجاتتارىن تەكسەرۋ ءۇشىن كۇدىكتى ەر ادامدى توقتاتتى. و.ەسىمدى ازامات پوليسيا قىزمەتكەرلەرىنە دەرەۋ تىيىم سالىنعان زاتتاردى بەرگەن. ۇستالعان ازامات تۇسىندىرگەندەي، ول بەلگىسىز ەر ادامنان جەكە پايدالانۋى ءۇشىن 30 مىڭ تەڭگەگە ەسىرتكى ساتىپ العان. ەسىرتكىنى ساتىپ العاننان كەيىن كۇدىكتى ءوز ۇيىنە قاراي جول تارتقان، سول جەردە ۇستالدى. قازىرگى ۋاقىتتا سوت-حيميالىق ساراپتاما تاعايىندالدى. قىلمىستىق ءىس اياسىندا ەسىرتكى زاتتارىن ساتۋمەن اينالىسقان ازاماتتى انىقتاۋ بويىنشا جەدەل ىزدەستىرۋ شارالارى جۇرگىزىلۋدە»، – دەدى اۋەزوۆ اۋداندىق پب جانىنداعى پوليسيا ءبولىمىنىڭ باستىعى ەلنۇر قۇدرەتبايەۆ.