2022 جىلعى كورسەتكىشتەردىڭ قورىتىندىسىنا ساي ىشكى تۋريستەردىڭ سانى 8،6 ملن ادامعا جەتتى.
بۇل 2021 جىلمەن سالىستىرعاندا 1،7 ملن ادامعا كوپ، دەپ حابارلايدى Almaty-akshamy.kz قازاقپاراتقا سىلتەمە جاساپ.
سونداي-اق ەلىمىزدە دەمالىس ورىندارىنىڭ سانى بىرنەشە جۇزگە ارتقانى دا ماڭىزدى. ماسەلەن، بىلتىر تۋريستەردى ورنالاستىرۋعا ارنالعان 284 جاڭا ورىن تىركەلگەن، ەلىمىز بويىنشا ولاردىڭ جالپى سانى 4 مىڭعا جەتتى. ال ءبىر مەزگىلدەگى سىيىمدىلىق 10 مىڭ بىرلىككە ارتىپ، 203 مىڭنان استام توسەك-ورىندى قۇرادى.
«بىزگە شەتەلدىك قوناقتاردى تارتۋمەن قاتار ىشكى تۋريزم كورسەتكىشتەرى دە ماڭىزدى. مىسالى، ەلىمىزدە ءبىر جىلدان استام ۋاقىت بويى Kids go Free باعدارلاماسى جۇمىس ىستەيدى، سونىڭ ارقاسىندا بالالارعا قازاقستان بويىنشا تەگىن ۇشاق بيلەتتەرى ۇسىنىلادى. سونداي-اق ەل ىشىندە ساياحاتتايتىن ازاماتتار ءۇشىن تۋريستىك كەشبەك ەنگىزۋ جوسپارلانىپ وتىر. ءبىز ءقازىردىڭ وزىندە بار دەستيناسيالار مەن ىشكى تۋريزمگە دەگەن قىزىعۋشىلىقتى ارتتىرۋ باعىتىندا جۇمىستى جالعاستىرامىز»، — دەدى مادەنيەت جانە سپورت ۆيسە-مينيسترى ەرجان ەركىنبايەۆ.