قانداستاردى قابىلداۋ جانە جايعاستىرۋ ساياساتى دا قايتا قارالاتىن بولادى.
قازاقستان ۇكىمەتى كوشى-قوندى ىنتالاندىرۋ ءۇشىن قانداي شارالاردى ىسكە اسىرۋ كەرەكتىگىن قاراستىرىپ جاتىر، دەپ حابارلايدى Almaty-akshamy.kz.
«مەملەكەت باسشىسى قاسىم-جومارت توقايەۆتىڭ بيىلعى 1 قىركۇيەكتەگى قازاقستان حالقىنا جولداۋىندا ەلىمىزدىڭ كوشى-قون ساياساتىنىڭ تيىمدىلىگىن ارتتىرۋ بويىنشا جاڭا شارالار پاكەتى ۇسىنىلدى. ولاردى ىسكە اسىرۋ ماقساتىندا كوشى-قون ساياساتىنىڭ الداعى 5 جىلعا ارنالعان جاڭا تۇجىرىمداماسى شەڭبەرىندە ىشكى كوشى-قوندى ىنتالاندىرۋعا باعىتتالعان ءبىرقاتار شارالار كوزدەلەتىن بولادى»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مەملەكەت باسشىسىنىڭ ىشكى كوشى-قون ساياساتىن قايتا قاراۋ جونىندەگى تاپسىرماسىن ورىنداۋ ءۇشىن جاڭا تۇجىرىمداما شەڭبەرىندە ەلدىڭ باسقا وبلىستارىندا نەگىزدەلگەن ترانسفەرت جانە قولدانىستاعى بيزنەس-جوبالاردى كەڭەيتۋ ارقىلى جۇمىس ورىندارىن قۇرا وتىرىپ، ازاماتتاردىڭ سولتۇستىك جانە ورتالىق وڭىرلەرگە رەتتەلەتىن قونىس اۋدارۋىن ۇيىمداستىرۋ تەتىگى كوزدەلەتىن بولادى.
وسى باعىت شەڭبەرىندە:
- ءاربىر قابىلداۋشى وبلىستا جەر رەسۋرستارىمەن، ينجەنەرلىك، كولىك-لوگيستيكالىق جانە الەۋمەتتىك ينفراقۇرىلىمدارمەن قامتاماسىز ەتۋدى ەسكەرە وتىرىپ، قونىس اۋدارۋدى ىنتالاندىرۋدىڭ ارنايى وڭىرلىك باعدارلاماسىن ازىرلەۋ كوزدەلەدى. سونداي-اق باعدارلامالاردا جۇمىس كۇشىنىڭ تاپشىلىعىن سەزىنەتىن ەكونوميكانىڭ باسىم سەكتورلارى ايقىندالاتىن بولادى؛
- جۇمىس ورىندارىن قۇرۋ بويىنشا بارىنشا الەۋەتى بار ءتيىستى بيزنەس-يدەيالار كونكۋرسى ارقىلى سولتۇستىك جانە ورتالىق وڭىرلەر ءۇشىن 100 بيزنەس-جوبانىڭ كەيسىن قالىپتاستىرۋ ماسەلەسى پىسىقتالۋدا؛
- جامبىل وبلىسىنىڭ وڭ تاجىريبەسىن ەسكەرە وتىرىپ، ورتالىق جانە سولتۇستىك وڭىرلەردە وندىرىسكە جانە تەحنيكامەن قامتاماسىز ەتۋگە جەڭىلدەتىلگەن كرەديتتەر ارقىلى اۋىل شارۋاشىلىعى كووپەراسيالارىن قۇرۋ جانە كەڭەيتۋ كوزدەلەدى؛
- جۇمىس بەرۋشى جۇمىسقا ورنالاسۋ فاكتىسىن راستاعان جاعدايدا، قونىس اۋدارۋشىلار ءۇشىن جاڭا جەردەگى تۇرعىن ءۇي قۇنىنىڭ 50% - ى مولشەرىندە (بەرىلەتىن تۇرعىن ءۇيدىڭ ورنىنا) قارجىلىق كومەك الۋ قۇقىعىن كۋالاندىراتىن ۇتقىرلىق سەرتيفيكاتتارىن ەنگىزۋ جوسپارلانۋدا. بۇل سوما تۇرعىن ءۇي سالۋعا نەمەسە ساتىپ الۋعا، سونداي-اق وتباسى بانكىنە باستاپقى جارنانى ەنگىزۋگە باعىتتالۋى مۇمكىن.
مەملەكەت باسشىسىنىڭ تاپسىرماسىن ورىنداۋ ماقساتىندا جاڭا تۇجىرىمداما اياسىندا تاريحي وتانىندا قانداستاردى قابىلداۋ جانە جايعاستىرۋ ساياساتى دا قايتا قارالاتىن بولادى.
اتاپ ايتقاندا، قۇجاتتاردى قابىلداۋ كەزەڭىندە قانداستىڭ كەلەتىن جەرىن ايقىنداۋ تەتىگىن ەنگىزۋ جانە وسى وڭىردە تۇراقتى تۇرۋدىڭ بەلگىلى ءبىر مەرزىمىنەن كەيىن ازاماتتىق بەرە وتىرىپ، ەڭبەك كۇشى تاپشى وڭىرلەرگە كوشۋدى رەتتەۋ مەن ىنتالاندىرۋ جونىندە شارالار قابىلداۋ كوزدەلەدى.
بۇل ءتاسىل گەرمانيادا، يزرايلدە جانە رەسەيدە وتانداستاردىڭ جەرگىلىكتى قوعامعا ينتەگراسيالانۋ پروسەستەرىن رەتتەۋ جانە ۇلتتىق ەكونوميكانىڭ قاجەتتىلىكتەرىن ەسكەرە وتىرىپ، ولاردىڭ الەۋەتىن پايدالانۋ ءۇشىن ءساتتى قولدانىلادى.
بۇدان باسقا، تاريحي وتانىمەن بايلانىستى نىعايتۋ ماقساتىندا جوعارى دەڭگەيدەگى ماماندار نەمەسە ءوز ەلدەرىندە تابىستى بيزنەس-كەيستەردى ىسكە اسىرعان جانە ولاردى قازاقستاندا ماسشتابتاۋعا نيەت بىلدىرگەن ەتنيكالىق قازاقتارعا (باسقا ەلدەردىڭ ازاماتتارىنا) ارنالعان قازاق كارتاسىن ەنگىزۋ جانە ونى بەرۋ ۇسىنىلادى.
وسى كارتانىڭ يەسى ساياسي قۇقىقتاردى قوسپاعاندا، تۇرۋ قۇقىعىمەن بىردەي بولاتىن ەلگە جەڭىلدەتىلگەن كىرۋ قۇقىعىن (بيزنەس اشۋ، جىلجىمايتىن مۇلىككە جانە باسقا مۇلىككە يەلىك ەتۋ، قارجىلىق وپەراسيالاردى جۇرگىزۋ) يەلەنەدى.