تەمىرجول جەلىسىن ىسكە قوسۋ وتاندىق ءونىمنىڭ ەكسپورتىن ۇلعايتۋعا باعىتتالعان.
قاراعاندىدا ءىرى تەمىرجول جوباسىنىڭ قۇرىلىسى باستالدى، دەپ حابارلايدى Almaty-akshamy.kz Primeminister.kz سىلتەمە جاساپ.
ۇزىندىعى 836 كم جاڭا تەمىرجول جەلىسىن ىسكە قوسۋ وتاندىق ءونىمنىڭ ەكسپورتىن ۇلعايتۋعا باعىتتالعان. قۇرىلىس بارىسىندا 419 قۇرىلىس نىسانى - 5 ءىرى كوپىر، 87 شاعىن جانە ورتا ماسشتابتاعى كوپىر، 288 سۋ جۇرگىزۋ قۇبىرى، 14 اۆتوجول وتكەلى جۇرگىزىلەدى. قۇرىلىستى تولىق اياقتاۋ 2025 جىلدىڭ 4-توقسانىنا جوسپارلانعان.
جۇمىستى ىسكە قوسۋ راسىمىنە پرەمەر-مينيستر ءاليحان سمايىلوۆ ونلاين رەجيمدە قاتىستى.
ءوز سوزىندە ۇكىمەت باسشىسى وسىنداي ستراتەگيالىق ماڭىزى بار جوبا مەملەكەت باسشىسىنىڭ تاپسىرماسى بويىنشا ىسكە اسىرىلىپ جاتقانىن جانە رەسپۋبليكانىڭ كولىك-ترانزيت الەۋەتىن دامىتۋدا ماڭىزى زور ەكەنىن اتاپ ءوتتى.
پرەمەر-مينيستردىڭ ايتۋىنشا، سوڭعى بەس جىلدا ەلىمىزدە ترانزيتپەن كونتەينەر تاسىمالداۋ كولەمى 4،4 ەسە ءوستى، بيىلعى 10 ايدا ەكسپورتتاعى جۇك اينالىمى 74 ملرد توننا-كيلومەتردەن استى. بۇل وتكەن جىلمەن سالىستىرعاندا 11%-عا ارتىق.
تەمىرجول سالاسىندا ءبىرقاتار ءىرى ينفراقۇرىلىمدىق جوبالاردى ىسكە اسىرۋ تۋرالى شەشىم قابىلداندى. ولاردىڭ ىشىندە دوستىق – مويىنتى، باقتى – اياگوز، داربازا – ماقتاارال، الماتى ماڭىنداعى اينالما جولدارى بار.
«مىنە، بۇگىن سونىڭ ءبىرى ءارى ءىرى جوبا دوستىق – مويىنتى ەكىنشى تەمىرجول قۇرىلىسىن باستاعالى تۇرمىز. بۇل جوبا وسى باعىتتا وتكىزۋ مۇمكىندىگىن 5 ەسەگە ارتتىرۋعا مۇمكىندىك بەرەدى جانە ەكسپورتتىق تاسىمال ماسەلەسىن تولىق شەشەدى»، دەدى ءاليحان سمايىلوۆ.
جوبانى ىسكە اسىرۋ كەزىندە 80%-ى قازاقستاننىڭ ۇلەسىنە تۇسەدى. ياعني، شپالداردى، رەلستەردى، ترانسفورماتورلاردى جاساۋدى، ينەرتتى ماتەريالداردى، قۇم مەن قيىرشىق تاستى جەتكىزۋدى جەرگىلىكتى كومپانيالار جۇزەگە اسىرادى. سونداي-اق قۇرىلىسقا 3 700 ادام جۇمىلدىرىلماق، ال تەمىرجول جەلىسى پايدالانۋعا بەرىلگەن كەزدە 500 ادام تۇراقتى جۇمىسقا ورنالاستىرىلادى.
رەسمي شاراعا ورتالىق جانە جەرگىلىكتى مەملەكەتتىك ورگاندار مەن ءبىرقاتار قازاقستاندىق ءىرى كومپانيا وكىلدەرى، تەمىرجولشىلار مەن سالا ارداگەرلەرى قاتىستى.