سەناتور سارىبايەۆ سپورت سالاسىنا قاتىستى سىن ايتتى

"سپورت فەدەراسيالارى ءوز بەتىنشە اشىلادى جانە رەسپۋبليكالىق بىرلەستىكتەردەن وقشاۋ ءومىر سۇرەدى.

ال ولاردىڭ باپكەرلەرى جاس بالالاردى جاتتىعۋعا تارتىپ، جەتكىنشەكتەردىڭ دەنساۋلىعىنا زيان تيگىزۋى مۇمكىن"، - دەپ ەسەپتەيدى سەناتور عالياسقار سارىبايەۆ.

سەناتور عالياسقار سارىبايەۆ ەلىمىزدىڭ سپورت سالاسىندا قالىپتاسقان جاعدايدى سىنعا الدى. بۇل تۋرالى ول ەلىمىزدىڭ پرەمەر-مينيسترىنە جولداعان دەپۋتاتتىق ساۋالىندا جاريا ەتتى، دەپ حابارلايدى Almaty-akshamy.kz 24.kz-كە سىلتەمە جاساپ.

سەناتور قازىرگى ۋاقىتتا سپورتتاعى بالالاردىڭ جۇكتەمەسىنە الاڭداۋلى. مۇنداي جاعداي، اسىرەسە، جەكپە-جەك ونەرىندە كەڭ تارالعان. ول: «جاس ۇرپاقتىڭ دەنساۋلىعىنا تەرىس اسەر ەتەدى»، – دەيدى.

وسى ورايدا دەپۋتات جاتتىقتىرۋشىلار مەن تورەشىلەردى تىركەپ، قىزمەتىن ليسەنزيالاۋدى ۇسىندى. ال بالالارعا تاربيە-جاتتىعۋ ادىستەمەلەرىن دايىنداۋ كەرەكتىگىن العا تارتتى. 

«جاتتىعۋشىلار بالالاردى ەرتە جاستان سپورتقا تارتۋ تەندەنسياسىن قالىپتاستىردى. ءتىپتى قازىرگى كەزدە ەلىمىزدە بەلگىلەنگەن جاس ەرەكشەلىكتەرى مۇلدەم ساقتالماي وتىر. جارىستاردا كەيبىر ادىلەتسىز تورەشىلەردىڭ كەسىرىنەن كەيبىر سپورتشىلاردىڭ ساعى سىنىپ، سپورتپەن قوشتاسۋدا. تاعى ءبىر ەسكەرەتىن جاعداي، بۇرىن بالالار مەن جاسوسپىرىمدەردىڭ جىلىنا قانشا جارىسقا قاتىسۋىنا بولاتىندىعىن رەتتەيتىن نورمالار بولعان. قازىرگى ۋاقىتتا ءبىزدىڭ ەلىمىزدە مۇنداي نورمالار قابىلدانباعان. وسىنداي جاعدايلار فەدەراسيالاردىڭ ءوز بەتىمەن اشىلىپ، جۇمىس ىستەپ  جاتقاندىعى دا اسەرى»، - دەدى ق ر پارلامەنتى سەناتىنىڭ دەپۋتاتى عالياسقار سارىبايەۆ.