قازاقستاندا جىل باسىنان بەرى قاناينالىم جۇيەسى اۋرۋلارىنان بولاتىن ءولىم-جىتىم 8،5%، ونىڭ ىشىندە جۇرەكتىڭ يشەميالىق اۋرۋى 12%، ءجىتى ميوكارد ينفاركتىسى 4،6%، ستەنوكارديا 10%، ينسۋلت-13،5% تومەندەدى.
بۇل رەتتە وتكەن جىلدىڭ ۇقساس كەزەڭىمەن سالىستىرعاندا اشىق جۇرەككە جاسالاتىن وپەراسيالار سانى ەلىمىز بويىنشا 7،1% ءوستى، دەپ حابارلايدى Almaty-akshamy.kz
جىل باسىنان بەرى 6 148 اشىق جۇرەككە وپەراسيا جاسالدى، جۇرەككە ينتەرۆەنسيالىق ارالاسۋلار سانى 14% ارتىپ، 55 000-نان استام ارالاسۋدى قۇرادى، بۇل 2022 جىلدىڭ سايكەس كەزەڭىمەن سالىستىرعاندا 6 500-گە ءوستى.
"رەسپۋبليكادا العاش رەت ۇلتتىق عىلىمي كارديوحيرۋرگيالىق ورتالىقتىڭ بازاسىندا اۋىر سوزىلمالى جۇرەك جەتكىلىكسىزدىگى (سجج) بار پاسيەنتتەردى ەمدەۋ ءۇشىن بىرەگەي جوعارى تەحنولوگيالىق كارديوحيرۋرگيالىق وپەراسيالار ەنگىزىلدى. مۇنداي وپەراسيالارعا قاناينالىمىن ۇزاق مەحانيكالىق قولداۋ قۇرىلعىسىن – جۇرەكتىڭ جاساندى سول جاق قارىنشاسىن يمپلانتاتتاۋ جاتادى. 10 جىلدىڭ ىشىندە كارديوحيرۋرگيا ورتالىعىنا وسىنداي 460 قۇرىلعى يمپلانتاتتالدى، تەك بيىلعى جىلى 18 پاسيەنت كىرىكتىرىلگەن اپپاراتتاردىڭ ارقاسىندا ءومىر ءسۇرۋ مۇمكىندىگىنە يە بولدى"،-دەپ حابارلايدى دەنساۋلىق ساقتاۋ مينيسترلىگى.
قازاقستاندا بارلىعى 13 كارديوحيرۋرگيالىق ورتالىقتا/بولىمشەدە 602 قولقا قاقپاقشاسىن يمپلانتاتتاۋ جۇرگىزىلدى. ونىڭ ىشىندە 2023 جىلدىڭ ءبىرىنشى جارتىجىلدىعىندا 80 ترانسكاتەتەرلىك TAVI قولقا قاقپاقشاسىن يمپلانتاتتاۋ ورىندالدى.
قازاقستان - ورتالىق ازياداعى جۇرەك پەن وكپەنى ترانسپلانتاتتاۋ جۇرگىزىلەتىن جالعىز ەل. كەيىنگى 10 جىلدا ۇعكو بازاسىندا دونورلىق جۇرەكتى ترانسپلانتاتتاۋ بويىنشا 86 وپەراسيا جاسالدى. سونىمەن قاتار بيىل شىلدە ايىندا العاش رەت "شىمكەنت جۇرەك ورتالىعى" كەاق جانە "كارديولوگيا جانە ىشكى اۋرۋلار عىلىمي-زەرتتەۋ ينستيتۋتى" اق قابىرعالارىندا ەكى پاسيەنتكە جۇرەكتى ترانسپلانتاتتاۋ ءساتتى جۇرگىزىلدى.