پينگۆيندەر جويىلىپ كەتۋى مۇمكىن

يمپەراتورلىق پينگۆيندەر جەر بەتىنەن جويىلىپ كەتۋى مۇمكىن. عالىمدار وسىلاي دەپ دابىل قاعىپ وتىر.

ولاردىڭ الاڭداۋى بەكەر ەمەس. ويتكەنى سوڭعى زەرتتەۋ ناتيجەلەرى كورسەتىپ وتىرعانداي، بىلتىر 10 مىڭداي بالپاناق قىرىلىپ قالعان، دەپ حابارلايدى Almaty-akshamy.kz 24.kz-كە سىلتەمە جاساپ. 

عالىمدار انتاركتيكاداعى بەللينسگاۋزەن تەڭىزىندەگى يمپەراتورلىق پينگۆيندەردى باقىلاعان. بۇل تەڭىز قۇستارىنىڭ ىشىندەگى ەڭ ىرىلەرى. بىلتىر سولاردىڭ 10 مىڭ بالاپانى قىرىلىپ قالعان. ويتكەنى ولاردىڭ تىرشىلىك ەتۋى ءۇشىن قاجەتتى مۇز تەز جۇقارىپ بارادى. ءسويتىپ قاناتى ءالى قاتپاعان بالاپاندار سۋعا قۇلاپ، ءوز بەتىنشە جۇزە الماي، ءولىپ قالادى ەكەن.

نورمان رەتكليفف، بريتاندىق انتاركتيكالىق قىزمەتىنىڭ وكىلى: - ءبىز يمپەراتورلىق پينگۆيندەردىڭ 5 تىرشىلىك ەتۋ ايماعىن باقىلادىق. مۇنداي جاعداي سولاردىڭ تورتەۋىندە تىركەلگەن. بىلتىر تەك ءبىر ايماقتا عانا بالاپاندار ءتىرى قالعان.

بۇعان كليماتتىڭ وزگەرۋى سەبەپ دەيدى ماماندار. رەكوردتىق تەمپەراتۋرا سالدارىنان مۇز قاتىپ ۇلگەرمەيدى. ادەتتە مينۋس 50 گرادۋس بولاتىن كەزدە بىلتىر انتاركتيدادا مينۋس 10 گرادۋس بولعان.

نورمان رەتكليفف، بريتاندىق انتاركتيكالىق قىزمەتىنىڭ وكىلى: - بۇكىل انتاركتيدا بويىنشا 2،7 ميلليون شارشى شاقىرىم مۇز ەرىپ كەتكەن. بۇل ۇلىبريتانيا اۋماعىنان 10 ەسە كوپ. كەيىنگى 45 جىلدا مۇنداي جاعداي العاش رەت تىركەلىپ وتىر.

انتاركتيدادا يمپەراتورلىق پينگۆيندەردىڭ 62 مەكەن ەتۋ ايماعى بەلگىلى. 2018-2022 جىلدار ارالىعىندا سولاردىڭ 30 پروسەنتىنە مۇزدىقتاردىڭ ەرۋى اسەر ەتكەن. جاعداي وسىلاي جالعاسا بەرسە، وسى عاسىردىڭ سوڭىنا تامان يمپەراتورلىق پينگۆيندەردىڭ 90 پايىزى جەر بەتىنەن جويىلىپ كەتەدى دەيدى عالىمدار. ولار مۇنداي جاعدايدى بولدىرماۋ ءۇشىن ەڭ باستىسى اتموسفەراعا بولىنەتىن زياندى گازداردىڭ مولشەرىن كۇرت ازايتۋ كەرەك ەكەنىن تاعى دا ايتادى.