ەممانيۋەل ماكرون قازاقستان فرانسيانىڭ ستراتەگيالىق سەرىكتەسى ەكەنىن اتاپ ءوتتى.
2024 جىلى قازاقستاندا فرانسۋز تىلىندە وقىتاتىن جاڭا مەكتەپتەر اشىلادى. بۇل تۋرالى فرانسيا پرەزيدەنتى ەممانيۋەل ماكرون قازاقستان پرەزيدەنتىمەن كەزدەسۋ بارىسىندا ايتتى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
پاريجگە رەسمي ساپارمەن كەلگەن مەملەكەت باسشىسى قاسىم-جومارت توقايەۆ فرانسيا پرەزيدەنتى ەممانيۋەل ماكرونمەن كەڭەيتىلگەن قۇرامدا كەلىسسوز جۇرگىزدى. كەلىسسوزگە دەيىن ەليسەي سارايىندا رەسمي قارسى الۋ ءراسىمى ءوتتى.
كەزدەسۋ بارىسىندا قاسىم-جومارت توقايەۆ فرانسياعا رەسمي ساپارمەن كەلۋگە شاقىرعانى جانە قازاقستان پرەزيدەنتى لاۋازىمىنا قايتا سايلانۋىنا وراي قۇتتىقتاعانى ءۇشىن ەممانيۋەل ماكرونعا العىس ايتتى. مەملەكەت باسشىسى بۇل ساپار ەكى ەل اراسىنداعى ستراتەگيالىق سەرىكتەستىكتى نىعايتىپ، قارىم-قاتىناستى جاڭا دەڭگەيگە كوتەرۋگە زور مۇمكىندىك بەرەتىنىن اتاپ ءوتتى. فرانسيا 2005 جىلدان بەرى قازاقستان ەكونوميكاسىنا جالپى كولەمى 17 ميلليارد دوللار ينۆەستيسيا قۇيىپ، ەڭ ءىرى بەس ينۆەستور ەلدىڭ قاتارىنا كىردى. سوڭعى 9 ايدا ەكىجاقتى تاۋار اينالىمى 2،5 ميلليارد دوللارعا جەتتى. بۇل بىلتىرعى وسى كەزەڭمەن سالىستىرعاندا 6،1 پايىزعا جوعارى.
فرانسيانىڭ ورتالىق ازيا ەلدەرىمەن جاساعان ساۋدا-ساتتىعىنىڭ 90 پايىزى قازاقستانعا تيەسىلى. ەكى مەملەكەت ەنەرگەتيكا، تاۋ-كەن ءوندىرىسى، جەڭىل ونەركاسىپ، قۇرىلىس، اەروعارىش، ماشينا جاساۋ، دەنساۋلىق ساقتاۋ جانە تاماق ونەركاسىبى سالالارىندا ءتيىمدى جوبالاردى بىرلەسىپ جۇزەگە اسىرىپ كەلەدى.
قازاقستاندا 170-تەن استام فرانسيالىق كومپانيا مەن بىرلەسكەن كاسىپورىن جۇمىس ىستەيدى. ولاردىڭ اراسىندا ەكونوميكامىزدىڭ جەتەكشى ينۆەستورلارى سانالاتىن Total Energies، Air Liquide، Airbus، Alstom، Orano جانە Danone سەكىلدى كومپانيالار بار. بىلتىر ەلدەرىمىز ساۋدا-ەكونوميكالىق جانە ينۆەستيسيالىق ىنتىماقتاستىقتىڭ 2030 جىلعا دەيىنگى جول كارتاسىن بەكىتتى. كەلىسسوز بارىسىندا قاسىم-جومارت توقايەۆ ەلىمىزدە جۇرگىزىلىپ جاتقان ساياسي جانە ەكونوميكالىق جاڭعىرۋ ۇدەرىسى جونىندە ايتتى. ءوز كەزەگىندە ەممانيۋەل ماكرون قازاقستان فرانسيانىڭ ستراتەگيالىق سەرىكتەسى ەكەنىن اتاپ ءوتتى. ەكى ەل اراسىندا ساۋدا-ەكونوميكالىق ىنتىماقتاستىق قارقىندى دامىپ كەلەدى.
ەنەرگەتيكا سالاسىندا بىرلەسكەن جوبالار جۇزەگە اسىرىلىپ جاتىر. ەۋروپالىق وداق قازاقستانداعى ءتۇرلى جوبالارعا ينۆەستيسيا سالىپ كەلەدى.
فرانسيا پرەزيدەنتى قازاقستاندا جۇرگىزىلىپ جاتقان رەفورمالارعا قولداۋ ءبىلدىردى.
تاراپتار ەكى ەلدىڭ ءبىلىم جانە مادەنيەت سالالارىنداعى بايلانىستارىن نىعايتۋ جونىندە پىكىر الماسىپ، حالىقارالىق كۇن تارتىبىندەگى وزەكتى ماسەلەلەردى جانە ورتالىق ازيا وڭىرىندەگى جاعدايدى تالقىلادى.
كەزدەسۋ سوڭىندا قاسىم-جومارت توقايەۆ ەممانيۋەل ماكروندى قازاقستانعا ساپارمەن كەلۋگە شاقىردى.