بيىل تەستىلەۋ تالاپتارىندا وزگەرىس جوق
ماگيستراتۋراعا تۇسۋگە ارنالعان كەشەندى تەستىلەۋگە قاتىسۋ ءۇشىن تىركەۋ 18 ماۋسىم كۇنى باستالادى. تىركەۋ ق ر بعم ۇلتتىق تەستىلەۋ ورتالىعىنىڭ app.testcenter.kz سايتىندا جۇرگىزىلەدى، دەپ حابارلايدى Almaty-akshamy.kz. ق ر بعم مينيسترلىگىنىڭ باسپا ءسوز قىزمەتى تاراتقان حابارعا سىلتەمە جاساپ.
«تىركەۋ كەزىندە تەستىلەۋ وتكىزىلەتىن ورىندى وقۋعا ءتۇسۋشى ءوزى تاڭدايدى. سونداي-اق ۇلتتىق تەستىلەۋ ورتالىعىنىڭ سايتىندا بايقاۋ سىناعىنان وتۋگە بولادى. ەمتيحاندار 20 شىلدەدەن باستالىپ، 10 تامىزعا دەيىن جالعاسادى»، – دەدى ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ.
ماگيستراتۋراعا ءتۇسۋ فورماتىنا كەلەتىن بولساق، بيىل ەشقانداي وزگەرىس جوق. تەستىلەۋ ناتيجەلەرىمەن كەلىسپەگەن جاعدايدا تەستىلەنۋشى كت اياقتالعاننان كەيىن 30 مينۋتتىڭ ىشىندە اپەللياسياعا ءوتىنىش بەرە الادى.
«ماگيستراتۋراعا تۇسۋگە ارنالعان تەستىلەۋ 3 بولىمنەن تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان جانە ءبىلىم بەرۋ باعدارلامالارى توبىنىڭ بەيىنى بويىنشا تەست. شەت ءتىلىن مەڭگەرۋدىڭ جالپى حالىقارالىق قۇزىرەتتەرىنە (ستاندارتتارىنا) سايكەس شەت ءتىلىن مەڭگەرگەنىن راستايتىن ءبىر حالىقارالىق سەرتيفيكاتى بار ماگيستراتۋراعا تۇسۋشىلەر شەت ءتىلى بويىنشا كەشەندى تەستىلەۋدەن بوساتىلادى»، – دەپ اتاپ ءوتتى ادىلەت تويبايەۆ.
ايتا كەتكەن ءجون، بيىل مەملەكەتتىك ءبىلىم بەرۋ تاپسىرىسى بويىنشا ماگيستراتۋراعا ءتۇسۋ ءۇشىن شەكتى بالل وزگەرىسسىز قالدى جانە 75 بالدى قۇرايدى، وقۋعا اقىلى نەگىزدە ءتۇسۋ ءۇشىن 50 بالل جيناۋ قاجەت. ەمتيحان ءتورت ساعاتقا دەيىن جالعاسادى.
ەستەرىڭىزگە سالا كەتەيىك، باكالاۆريات بويىنشا گرانتتاردىڭ جالپى سانى - 56 561، ماگيستراتۋراعا 13 263، دوكتورانتۋراعا 1890 گرانت بولىنگەن. كادرلار دايارلاۋعا ارنالعان گرانتتار سۇرانىسقا يە باعىتتار بويىنشا بولىنەدى.