جىل باسىنان بەرى 7 مىڭنان استام مۇگەدەكتىگى بار ادام جۇمىسقا ورنالاستى.
ەڭبەكمينى جىل باسىنان بەرى مۇگەدەكتىگى بار قانشا ادام تۇراقتى جۇمىسقا ورنالاسقانى جايىندا اقپارات تاراتتى، دەپ حابارلايدى Almaty-akshamy.kz.
«2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا 2،2 مىڭنان استام مۇگەدەكتىگى بار ادام تۇراقتى جۇمىس ورنىنا جانە 5 مىڭنان استام ادام ۋاقىتشا جۇمىسقا ورنالاستىرىلدى. بۇعان قوسىمشا مۇگەدەكتىگى بار ادامدار ءۇشىن بەلگىلەنگەن جۇمىس ورىندارىنىڭ كۆوتاسى شەڭبەرىندە وسى جىلدىڭ 1 توقسانىندا حالىقتى جۇمىسپەن قامتۋ ورتالىقتارىنىڭ جولداماسى بويىنشا جۇمىس بەرۋشىلەر مۇگەدەكتىگى بار 348 ادامدى جۇمىسقا قابىلدادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
سونىمەن قاتار بيىل كورۋ، ەستۋ جانە تىرەك-قيمىل اپپاراتى بۇزىلعان ادامدار ءۇشىن 71 ارنايى جۇمىس ورنىن قۇرۋ قاراستىرىلعان. جۇمىس بەرۋشىلەردىڭ جابدىقتالۋىنا بايلانىستى شىعىندارىن سۋبسيديالاۋ كوزدەلگەن.
سونداي-اق ق ر كاسىپوداقتار فەدەراسياسىمەن بىرلەسىپ، مۇگەدەكتىگى بار ادامداردى «حالىق باقىلاۋشىلارى» رەتىندە تارتۋدى كوزدەيتىن الەۋمەتتىك ماڭىزدى «حالىقتىق باقىلاۋ» جوباسى ىسكە اسىرىلۋدا. بۇگىنگى تاڭدا جوباعا 164 كاسىپورىن جۇمىلدىرىلىپ، 521 قىزمەتكەر جۇمىسقا ورنالاستىرىلدى.
جوبا اياسىندا مۇگەدەكتىگى بار ادامدار بەينەباقىلاۋ وپەراتورلارى رەتىندە جۇمىسقا قابىلدانادى، ولار اۋىسىممەن جۇمىس ورىندارىنداعى ەڭبەك قاۋىپسىزدىگى جانە ەڭبەكتى قورعاۋ تالاپتارىنىڭ ساقتالۋىن قاداعالايدى.
جوباعا قاتىسۋ ءۇشىن كادرلاردى ىرىكتەۋ كەزىندە مۇگەدەكتىكتى (وندىرىستىك جاراقات، كاسىپتىك اۋرۋ، جالپى اۋرۋ) بەلگىلەۋ سەبەبى بويىنشا كاسىپورىندا جۇمىسىن تاستاپ كەتكەن قىزمەتكەرلەرگە باسىمدىق بەرىلەدى.
«حالىق باقىلاۋشىلارى» قازاقستان رەسپۋبليكاسىنىڭ زاڭناماسىنا سايكەس بارلىق ءتيىستى شەگەرىمدەرمەن جانە الەۋمەتتىك پاكەتتەرمەن قامتىلىپ، ەڭبەك شارتى بويىنشا شتاتقا قابىلدانادى.
جوبانى ىسكە اسىرۋ مۇگەدەكتىگى بار ادامدار ءۇشىن جۇمىس ورىندارىنىڭ بەلگىلەنگەن كۆوتاسى اياسىندا حالىقتى جۇمىسپەن قامتۋعا مۇمكىندىك بەرەدى، بۇل ءوز كەزەگىندە ەرەكشە قاجەتتىلىكتەرى بار ادامداردىڭ الەۋمەتتىك بەيىمدەلۋىنە ىقپال ەتەدى.