3 جەلتوقساندا بۇكىل الەمدە مۇگەدەكتەر كۇنى اتاپ وتىلەدى. ەگەمەندىك العالى بەرى ەلىمىزدە ەرەكشە قاجەتتىلىكتەرى بار ادامداردىڭ قۇقىقتارىن قورعاۋ، ءومىر ءسۇرۋ ساپاسىن ارتتىرۋ جانە ولاردىڭ قوعامعا تولىق ينتەگراسيالانۋى جونىندەگى ساياسات جۇزەگە اسىرىلۋدا. مۇگەدەكتەر كۇنى –مۇگەدەكتىگى بار ادامدارعا قۇرمەت پەن قولداۋ كورسەتۋگە، قوعامدا ازاماتتاردىڭ تەڭ ەكەنىن جانە ونى ەستە ساقتاۋ كەرەكتىگىن بىلدىرەدى.
بۇگىندە قازاقستاندا ەرەكشە قاجەتتىلىكتەرى بار 719 مىڭنان استام ادام تۇرادى. بۇل كۇن مۇگەدەكتىگى بار ازاماتتاردىڭ ماسەلەلەرىنە كوڭىل بولۋگە، قۇقىعى مەن دەنساۋلىقتارىن قورعاۋعا، ولاردىڭ ساياسي، الەۋمەتتىك، ەكونوميكالىق جانە مادەني ومىرگە قاتىسۋىنان قوعامعا كەلەتىن باسىمدىقتارعا نازار اۋدارۋعا باعىتتالعان.
ەرەكشە قاجەتتىلىكتەرى بار ازاماتتار ءتۇرلى سالادا ەڭبەك ەتۋدە. ولار قازاقستان رەسپۋبليكاسى پارلامەنتىنىڭ، وبلىستىق جانە قالالىق ءماسليحاتتاردىڭ دەپۋتاتتارى، مەملەكەتتىك قىزمەتشىلەر، مۇعالىمدەر، دارىگەرلەر، ينجەنەرلەر، زاڭگەرلەر، ارتىستەر جانە ت. ب. سالالىق ماماندىقتى يگەرىپ، جەتىستىكتەرگە قول جەتكىزۋدە.
بۇل ادامدار وزدەرىنىڭ مۇمكىندىكتەرى مۇلدەم شەكتەۋلى ەمەس ەكەنىن جانە ولار تولىققاندى ءومىر سۇرە الاتىندىعىن دالەلدەپ كەلەدى. ولار قوعامدىق جۇمىستارعا بەلسەندى ارالاسىپ، ءوز كاسىپتەرىن دامىتىپ، بي مەن فيتنەسپەن اينالىسىپ، ءارتۇرلى سپورت تۇرلەرىندە دە بيىك بەلەستەردى باعىندىرۋدا.
مۇگەدەكتىگى بار ادامدار ءومىردىڭ بەلگىلى ءبىر پروبلەمالىق اسپەكتىلەرىن تالقىلاۋعا ساراپشى رەتىندە بەلسەندى قاتىسادى. مۇنداي تاجىريبە ءتيىمدى شەشىمدەر قابىلداۋعا وڭ اسەر ەتىپ، ازاماتتاردىڭ الەۋمەتتىك قامسىزداندىرۋ جۇيەسىن ودان ءارى جەتىلدىرۋگە سەپتىگىن تيگىزۋدە.
سوڭعى جىلدارى مۇگەدەكتىگى بار ادامداردىڭ قۇقىقتارى مەن الەۋمەتتىك قورعالۋىن قامتاماسىز ەتۋ جۇيەسىندە ەلەۋلى وزگەرىستەر ورىن الدى. قازاقستان مۇگەدەكتەردىڭ قۇقىقتارى تۋرالى كونۆەنسياعا فاكۋلتاتيۆتىك حاتتامانى راتيفيكاسيالادى، ول ازاماتتارىمىزعا مۇگەدەكتەردىڭ قۇقىقتارى جونىندەگى بۇۇ كوميتەتىنىڭ قاراۋىنا جەكە وتىنىشتەر جىبەرۋگە مۇمكىندىك بەرەدى. الەۋمەتتىك كودەكس پەن باسقا دا زاڭنامالار قابىلدانىپ، ەرەكشە قاجەتتىلىكتەرى بار ادامدارعا ءبىلىم الۋعا، جۇمىسقا تۇرۋعا، مەديسينالىق، الەۋمەتتىك كومەككە جانە ت.ب. قۇقىقتارعا كەپىلدىك بەرۋدە. مۇگەدەكتىگى بار ەرەسەك ازاماتتار مەن ەرەكشە قاجەتتىلىكتەرى بار بالالارعا ارنالعان وڭالتۋ ورتالىقتارى اشىلۋدا. ارناۋلى الەۋمەتتىك قىزمەتتەر كورسەتۋ جۇيەسى جەتىلدىرىلۋدە. رەسپۋبليكانىڭ بارلىق وڭىرلەرىندە كەدەرگىسىز ورتا قۇرۋ بويىنشا جۇمىستار اتقارىلۋدا.
قازاقستاندا جىنىسىنا، جاسىنا، ۇلتىنا، فيزيكالىق ەرەكشەلىكتەرىنە جانە كەز كەلگەن وزگە دە سيپاتتامالارىنا قاراماستان، ءاربىر ادام ءوزىن تولىققاندى مۇشەسى رەتىندە سەزىنەتىن ينكليۋزيۆتى قوعامدى دامىتۋ جونىندەگى جۇمىستار ءوز جالعاسىن تابا بەرمەك.