ەشكىم ەلەۋسىز قالمايدى
الماتىدا حالىقارالىق مۇگەدەكتەر كۇنىنە ارنالعان «مۇمكىندىكتەر ۋاقىتى» اتتى II الەۋمەتتىك فورۋم وتۋدە، - دەپ حابارلايدى almaty-akshamy.kz.
بۇگىن 3 جەلتوقسان – حالىقارالىق مۇگەدەكتەر كۇنى. سوناۋ 1992 جىلى بۇۇ باس اسسامبلەياسىنىڭ قارارىمەن مۇمكىندىگى شەكتەۋلى جانداردى قورعاۋ ماقساتىندا وسى كۇن بەكىتىلگەن بولاتىن. وسىلايشا الەمدىك دەڭگەيدە مۇمكىندىگى شەكتەۋلى جانداردى قوعامعا الەۋمەتتەنۋىنە، ولارعا جاعداي جاساۋ سياقتى ماسەلەلەرگە نازار اۋدارا باستادى.
جاھاندىق باستامانى قازاقستان دا قولدايدى. ينكليۋزيۆتى قوعام قۇرۋ جولىندا الماتى قالاسىنىڭ تاجىريبەسى كوپشىلىككە ۇلگى بولماق. وسى باعىتتا قالامىزدا اتقارىلىپ جاتقان شارالار تۋرالى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ ءوز سوزىندە اتاپ ءوتتى. ونىڭ سوزىنشە الماتىدا 56 مىڭ مۇمكىندىگى شەكتەۋلى ازامات بار. بيىل ولاردى قولداۋ ماقساتىندا الماتى قالاسى اكىمى ەربولات دوسايەۆتىڭ باستاماسىمەن ينۆاتاكسي جوباسى، قالامىزداعى بۇكىل نىسانداردى مۇمكىندىگى شەكتەۋلى جاندارعا قولايلى جاعداي جاساۋى ءۇشىن پاسپورتتاۋ جوباسى جۇزەگە اسا باستادى.
شاراعا وتاندىق جانە شەت ەلدىك ۇكىمەتتىك ەمەس ۇيىم وكىلدەرىمەن قاتار مەملەكەتتىك سەكتور وكىلدەرى قاتىستى. پارلامەنت سەناتىنىڭ دەپۋتاتى لياززات قالتايەۆانىڭ سوزىنشە مۇمكىندىگى شەكتەۋلى جانداردى قولداۋ ماقساتىندا بىرنەشە باعىتتا زاڭ جوبالارى قابىلداندى.
فورۋم وزگە شارالارعا قاراعاندا ەرەكشە وتۋدە. ايتا كەتەر بولساق، ءۇش بولىمنەن تۇرادى: TED كونفەرەنسيا، Town Hall جانە نەتۆوركينگ. العاشقى بولىمدە مۇمكىندىكتەر قوعامىن قۇرۋ ماسەلەلەرىمەن اينالىساتىن مەملەكەتتىك، رەسپۋبليكالىق جانە حالىقارالىق ۇيىمداردىڭ سپيكەرلەرى مەن ساراپشىلارى ءوز تاجىريبەسىمەن ءبولىستى.
