قازاقستاندا تۋريستەردى قابىلداۋ ەلەكتروندىق باقىلاۋدا بولادى
بۇگىن Sheraton Nur-Sultan Hotel قوناق ۇيىندە eQonaq - تۋريستەردى ەسەپكە الۋ، تۋريستىك اعىندى تالداۋ جانە كوشى-قون باقىلاۋىن جۇزەگە اسىرۋعا ارنالعان ءبىرىڭعاي اقپاراتتىق جۇيەسىنىڭ جۇمىسى تانىستىرىلدى، دەپ حابارلادى Almaty-akshamy.kz. ق ر مادەنيەت جانە سپورت مينيسترلىگىنىڭ تاراتقان حابارىنا سىلتەمە جاساپ.
ءىس-شاراعا ق ر مادەنيەت جانە سپورت ءمينيسترى اقتوتى رايىمقۇلوۆا، ۆيسە-مينيستر عابيدوللا ءابدىراحىموۆ، كۇش قۇرىلىمدارىنىڭ وكىلدەرى، سونداي-اق تۋريستىك بيزنەس-قوعامداستىق قاتىستى.
«قازىرگى نەگىزگى مىندەتتەردىڭ ءبىرى سيفرلاندىرۋ جانە تۋريستەردىڭ كەلۋ پروسەستەرىن جەڭىلدەتۋگە ارنالعان اقپاراتتىق جۇيەلەردى كەڭىنەن ەنگىزۋ»، - دەپ اتاپ ءوتتى اقتوتى رايىمقۇلوۆا.
Kazakh Tourism باسقارما ءتوراعاسى ەرجان ەركىنبايەۆ شەتەلدىك تۋريستەردى تارتۋ ماسەلەلەرىندە ولاردىڭ سانىن عانا ەمەس، اتاپ ايتقاندا، تۋريستەر ءبىزدىڭ ەلدە قانشا كۇن توقتايتىنىن، قانداي ورىندارعا ءجيى باراتىنىن، قانداي قىزمەتتەردى پايدالاناتىنىن ءبىلۋ ماڭىزدى ەكەنىن ايتتى.
«ءتۋريستىڭ قازاقستاندا بولعان كۇندەر سانىن ەسەپتەۋ ءۇشىن قوناق ۇيدە تۇرعانى تۋرالى مالىمەتتەردى الۋ قاجەت. ءبىز ءاربىر مەيمانحانا ءوز قوناقتارىنىڭ ەسەبىن جۇرگىزەتىنىن جانە ولاردا وسىنداي مالىمەتتەردىڭ بار ەكەنىن بىلەمىز. مىندەت - وسى دەرەكتەردى ءبىرىڭعاي تالداۋ جۇيەسىنە جيناقتاۋ»، - دەدى ەرجان ەركىنبايەۆ.
ازىرلەۋشىلەردىڭ حابارلاۋىنشا، eQonaq ق ر تۋريستىك سالاسىن دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىنىڭ جۇيەلى ءىس -شاراسى جانە باستاپقىدا تۋريستىك اعىن ستاتيستيكاسىن رەتتەۋدى كوزدەگەن بولاتىن.
سونداي-اق، وتكەن جىلدىڭ قاڭتارىندا پرەزيدەنت شەتەلدىك تۋريستەردى مىندەتتى تىركەۋدەن باس تارتقانى بەلگىلى. ەندى بۇل فۋنكسيا ورنالاستىرۋ ورىندارىنا بەكىتىلگەن. ال كوشى-قون قىزمەتتەرىنە اقپارات بەرۋدىڭ ودان ارعى پروسەستەرىن وڭايلاتۋ ءۇشىن eQonaq جۇيەسى وسى مىندەتتەرگە ساي ينتەگراسيالانعان.
ەQonaq جۇيەسىن تاجىريبە جۇزىندە پايدالانۋدى Kazakh Tourism ۇلتتىق كومپانياسى 2020 جىلدىڭ IV توقسانىندا جۇزەگە اسىرعان. قازىرگى ۋاقىتتا جۇيە نۇر-سۇلتان جانە الماتى قالالارىندا، سونداي-اق اقمولا جانە سولتۇستىك قازاقستان وبلىستارىنداعى 383 ورنالاستىرۋ ورنىندا (قوناق ۇيلەر، حوستەلدەر، دەمالىس ۇيلەرى جانە ت.ب.) 21985 ءتۋريستى تىركەپ، ەنگىزگەن.
سونىمەن قاتار، جۇيەنى ازىرلەۋشىلەر Ashyq جۇيەسىمەن ينتەگراسيالاۋدى جوسپارلاپ وتىر.
«وزدەرىڭىز بىلەتىندەي، Ashyq جۇيەسىنىڭ ارقاسىندا ءبىز كينوتەاترلارعا، ءدامحانالار مەن مەيرامحانالارعا قايتا بارا باستادىق. ول ءۇشىن تەك ءوزىڭىزدىڭ جسن ەنگىزىپ، QR كودتى سكانەرلەۋ قاجەت. الايدا شەتەلدىكتەر جسن قازاقستاندىق سايكەستەندىرگىشسىز جۇيەنى پايدالانا المايدى، جۇيەدە شەتەلدىكتەر تۋرالى دەرەكتەر جوق. بۇل دەرەكتەردى ءبىز eQonaq جۇيەسى ارقىلى الا الامىز. بۇل تۋريستەرگە ەل ىشىندە ءقاۋىپ- قاتەرسىز جۇرۋگە مۇمكىندىك بەرەدى، سونىمەن قاتار ءبىز ءۇشىن تۋريستەر توقتاعان جەرلەرگە عانا ەمەس، سونىمەن بىرگە ولار ورنالاسقان جەرلەرگە دە قوسىمشا مالىمەتتەر قوسادى. بۇل تۋريزم سالاسىنداعى ينفراقۇرىلىمدى جوسپارلاۋ كەزىندە دە كومەكتەسەدى، ويتكەنى ءبىز تۋريستەر لەگىن كورەمىز»، - دەپ مالىمدەدى ەرجان ەركىنبايەۆ.
وسى جىلدىڭ ماۋسىم ايىندا الاكول، بالقاش، اتىراۋ جانە اقتاۋ قوناق ۇيلەرىنە eQonaq ەنگىزۋ جوسپارلانعان. جىل سوڭىنا دەيىن ەلىمىزدىڭ باسقا دا تۋريستىك ايماقتارىن قامتۋ جانە eQonaq جۇيەسى بار قوناق ۇيلەر سانىن 600-گە دەيىن جەتكىزۋ جوسپارلانىپ وتىر.
ءبىزدىڭ انىقتاما: Kazakh Tourism ۇلتتىق كومپانياسى اكسيونەرلىك قوعامى قازاقستان رەسپۋبليكاسى ۇكىمەتىنىڭ قاۋلىسىمەن 2017 جىلعى شىلدەدە قۇرىلعان. كومپانيانىڭ نەگىزگى مىندەتى-ەلدىڭ تۋريستىك الەۋەتىن شەتەلدە ىلگەرىلەتۋ، MICE ءىس-شارالارىن تارتۋ، سونداي-اق قازاقستاننىڭ تۋريستىك سالاسىنا ينۆەستيسيالار تارتۋ.