الەۋمەتتىك قورعاۋ
تامارا دۇيسەنوۆا ق ر پرەزيدەنتىنىڭ قازاقستان حالقىنا جولداۋىن ىسكە اسىرۋ ماسەلەلەرى بويىنشا كەڭەس وتكىزدى، دەپ حابارلايدى Almaty-akshamy.kz.
ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ۆيسە-مينيسترلەر، ق ر ەحاقم قۇرىلىمدىق بولىمشەلەرى، ەنشىلەس ۇيىمدارى مەن اۋماقتىق دەپارتامەنتتەرىنىڭ باسشىلارى، سونداي-اق جەرگىلىكتى اتقارۋشى ورگاندار وكىلدەرىنىڭ قاتىسۋىمەن كەڭەس وتكىزدى، ونىڭ بارىسىندا مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرمالارىن ىسكە اسىرۋ بويىنشا ناقتى مىندەتتەر جۇكتەلدى.
كەڭەس باسىندا مينيستر ق ر پرەزيدەنتى قاسىم-جومارت توقايەۆتىڭ قازاقستان حالقىنا جولداۋىندا ايتىلعان باستامالارىنىڭ الەۋمەتتىك ماڭىزدىلىعىن اتاپ ءوتتى.
«مەملەكەت باسشىسى ەڭ تومەنگى جالاقى دەڭگەيىن 60 مىڭنان 70 مىڭ تەڭگەگە دەيىن ارتتىرۋ تۋرالى شەشىم قابىلدادى. بۇل 1،8 ملن ازاماتتىڭ تابىسىنا تىكەلەي اسەر ەتەدى. سونىمەن قاتار، ول ەڭ تومەنگى جالاقىنى انىقتاۋدىڭ جاڭا ادىستەمەسىن ەنگىزۋدى تاپسىردى، بۇل ونىڭ مولشەرىن كەزەڭ-كەزەڭىمەن ارتتىرۋعا مۇمكىندىك بەرەدى. ەتج-نىڭ ۇلعايۋى قازاقستاندىقتاردىڭ ءال-اۋقاتىن ارتتىرۋعا وڭ اسەر ەتەدى، ويتكەنى بۇل كورسەتكىش مەملەكەتتىك الەۋمەتتىك ساقتاندىرۋ قورىنان تولەنەتىن الەۋمەتتىك تولەمدەردىڭ مولشەرىنە دە اسەر ەتەدى. ءتيىستى قۇرىلىمدىق بولىمشەلەرگە ديناميكالىق تاسىلدەمەگە نەگىزدەلگەن جانە نەگىزگى ەكونوميكالىق كورسەتكىشتەردى ەسكەرەتىن ەتج ايقىنداۋ ادىستەمەسىن ازىرلەۋگە كىرىسۋدى تاپسىرامىن»، – دەدى تامارا دۇيسەنوۆا.
مينيستر زەينەتاقى جۇيەسىنىڭ تيىمدىلىگىن ارتتىرۋعا، بالالى وتباسىلار مەن جۇمىسىنان ايىرىلعان ازاماتتاردى الەۋمەتتىك قولداۋ شارالارىن جاقسارتۋعا بايلانىستى تاپسىرمالاردىڭ، سونداي-اق جاستاردىڭ كاسىپكەرلىك باستامالارىنىڭ ماڭىزدىلىعىن اتاپ ءوتتى.
اتاپ ايتقاندا، مەملەكەت باسشىسى ەڭ تومەنگى بازالىق زەينەتاقى مولشەرىن ەڭ تومەنگى كۇنكورىس دەڭگەيىنىڭ 70% دەيىن، ال ەڭ جوعارى زەينەتاقى مولشەرىن 120% دەيىن جەتكىزۋدى تاپسىردى.
بۇعان دەيىن قابىلدانعان شەشىمدەرمەن بىرگە بۇل 2025 جىلعا قاراي جيىنتىق زەينەتاقىنى ورتا ەسەپپەن 27% ۇلعايتۋعا مۇمكىندىك بەرەدى.
كەڭ اۋقىمدى الەۋمەتتىك سۇرانىستى ەسكەرە وتىرىپ، پرەزيدەنت 2028 جىلعا دەيىن ايەلدەردىڭ زەينەتكە شىعۋ جاسىن 61 جاس دەڭگەيىندە بەلگىلەۋدى تاپسىردى.
سونداي-اق، مەملەكەت باسشىسى 2023 جىلعى 1 قاڭتاردان باستاپ بالا كۇتىمى بويىنشا تولەمدەر كەزەڭىن ءبىر جارىم جاسقا دەيىن ۇلعايتۋدى، ال الەۋمەتتىك ساقتاندىرۋ جۇيەسىنە قاتىسۋشىلار ءۇشىن جۇمىسىنان ايىرىلۋ بويىنشا تولەمدەر مولشەرىن ورتاشا ايلىق تابىستىڭ 45% دەيىن ارتتىرۋدى تاپسىردى.
پرەزيدەنت سونداي-اق كەلەسى جىلى ءتۇرلى جۇمىسپەن قامتۋ شارالارىمەن 100 مىڭعا جۋىق جاس قامتىلاتىنىن ايتتى. جاستار كاسىپكەرلىگىن قولداۋ ءۇشىن جىلدىق 2،5% - بەن جەڭىلدەتىلگەن شاعىن نەسيە بەرۋدىڭ جەكە تەتىگى ىسكە قوسىلادى.
«مەملەكەت باسشىسىنىڭ بۇل تاپسىرمالارى 2023 جىلعى 1 قاڭتاردان باستاپ ىسكە اسىرىلۋى ءتيىس. سوندىقتان مينيسترلىكتىڭ ءتيىستى قۇرىلىمدىق بولىمشەلەرىنە، مەملەكەتتىك الەۋمەتتىك ساقتاندىرۋ قورى مەن ەڭبەك رەسۋرستارىن دامىتۋ ورتالىعىنا قىسقا مەرزىمدە بارلىق قاجەتتى ەسەپتەردى جۇرگىزىپ، نقا مەن زاڭناماعا ءتيىستى وزگەرىستەر ەنگىزۋدى تاپسىرامىن. جەرگىلىكتى اتقارۋشى ورگانداردان پرەزيدەنتتىڭ تاپسىرمالارىن ىسكە اسىرۋ بارىسى تۋرالى ءاقپاراتتىق-تۇسىندىرۋ جۇمىسىنا بەلسەندى قوسىلۋدى سۇرايمىن»، – دەپ اتاپ ءوتتى تامارا دۇيسەنوۆا.
كەڭەس سوڭىندا مينيستر مەملەكەت باسشىسىنىڭ تاپسىرمالارىن ەسكەرە وتىرىپ، ق ر الەۋمەتتىك كودەكسىنىڭ جوباسىن پىسىقتاۋدى جانە جاقىن ارادا ونى اشىق نقا پورتالىندا ورنالاستىرۋدى تاپسىردى.