قازاقستاندا ەڭ كوپ گرانت ينجەنەرلىك سالاعا ءبولىندى

بۇدان بۇرىن حابارلاعانىمىزداي، بيىل پرەزيدەنتتىڭ تاپسىرماسى بويىنشا گرانتتاردىڭ جالپى سانى 5000-عا ارتتى.

2021-2022 وقۋ جىلىندا باكالاۆرياتقا ءتۇسۋ ءۇشىن 56 مىڭنان استام گرانت ءبولىندى، دەپ حابارلايدى Almaty-akshamy.kz ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن وتىنىشتەردى قابىلداۋ 13 شىلدەدە باستالىپ، 20 شىلدەگە دەيىن جالعاسادى.

ءبىلىم بەرۋ گرانتتارى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە جانە جۇمىس بەرۋشىلەردىڭ سۇرانىسقا يە ماماندىقتار تۋرالى اقپاراتىنا سايكەس بولىنگەن.

گرانتتاردىڭ ەڭ كوپ سانى ينجەنەرلىك، وڭدەۋ جانە قۇرىلىس سالالارىنا ءبولىندى – 17 028 گرانت. پەداگوگيكالىق عىلىمدار – 9573 گرانت، اقپاراتتىق – كوممۋنيكاسيالىق تەحنولوگيالار – 7487، جاراتىلىستانۋ عىلىمدارى – 4088، اۋىل شارۋاشىلىعى عىلىمدارى – 1895، دەنساۋلىق ساقتاۋ سالاسىنداعى ماماندىقتارعا – 2700، ونەر جانە گۋمانيتارلىق عىلىمدار – 1615، بيزنەس، باسقارۋ جانە قۇقىق – 1223، الەۋمەتتىك عىلىمدار، جۋرناليستيكا جانە اقپارات ماماندىقتارىنا 960 گرانت ءبولىندى.

«ماڭگىلىك ەل جاستارى – يندۋسترياعا» («سەرپىن») باعدارلاماسى شەڭبەرىندە دە گرانتتار قاراستىرىلعان.  

«تالاپكەرلەر قۇجاتتارىن اقپاراتتىق جۇيە ارقىلى تاپسىراتىن بولادى. سونىمەن بىرگە جوعارى وقۋ ورىندارىندا ۆيرتۋالدى قابىلداۋ كوميسسيالارى جۇمىس ىستەيدى. ماماندار وتكەن جىلداعىداي  بەينەبايلانىس ارقىلى تالاپكەرلەرگە كەڭەس بەرەدى»، – دەپ حابارلادى ق ر ءبىلىم جانە عىلىم ۆيسە-مينيسترى قۋانىش ەرعالييەۆ. 

2021-2022 وقۋ جىلىنداعى ءبىلىم بەرۋ گرانتتارىنىڭ تولىق ءتىزىمى اشىق دەرەككوزدە ورنالاستىرىلعان.