جەتىسۋ وڭىرىندە ەكى دارىگەرلىك امبۋلاتوريا اشىلدى

بۇل امبۋلاتوريالار 11 مىڭنان استام تۇرعىنعا ساپالى مەديسينالىق قىزمەت كورسەتەتىن بولادى. 

الماتى وبلىسىندا ەكى اۋىلدىق دارىگەرلىك امبۋلاتوريا ىسكە قوسىلدى، دەپ حابارلادى Almaty-akshamy.kz.

قاجەتتى زاماناۋي مەديسينالىق قۇرالدارمەن جابدىقتالعان جاڭا ەمدەۋ مەكەمەلەرى جامبىل اۋدانىنىڭ سارىباي بي جانە ۇڭگىرتاس اۋىلدارىندا  ىسكە قوسىلدى. بۇل تۋرالى الماتى وبلىسى اكىمىنىڭ باسپا ءسوز قىزمەتى حابارلاپ وتىر.

«دارىگەرلىك امبۋلاتوريادا جاڭا مەديسينالىق قۇرال-جابدىقتار ورناتىلعان. نىسان ءبىر اۋىسىمدا 35 ادام قابىلداۋعا ارنالعان. ءبىزدىڭ ۇجىمدا 12 قىزمەتكەر بار. ءبىز اۋىل تۇرعىندارىنا ساپالى قىزمەت كورسەتۋگە بار كۇش-جىگەرىمىزدى باعىتتايمىز»، - دەدى ۇڭگىرتاس اۋىلدىق امبۋلاتورياسىنىڭ مەڭگەرۋشىسى باعلان توباجانوۆا.

جاڭا ەمحانانىڭ جوبالىق قۇنى - 338 ملن تەڭگە. مۇندا بالالار مەن ەرەسەكتەرگە ارنالعان قابىلداۋ بولمەسى، ستوماتولوگ، گينەكولوگ، تەراپيەۆت كابينەتتەرى، زەرتحانا، كۇندىزگى ستاسيونار، جارا تاڭۋ بولمەسى بار. بۇل جەردە ۇڭگىرتاس اۋىلدىق وكرۋگىنىڭ 5 مىڭداي تۇرعىنى مەديسينالىق قىزمەت الا الادى.

سارىباي بي اۋىلىنداعى ەمدەۋ مەكەمەسى ءبىر اۋىسىمدا 25 ادامدى قابىلداي الادى. نىسان ەندىگى جەردە قاراسۋ اۋىلدىق وكرۋگىندەگى 4 ەلدى مەكەننىڭ 6 مىڭنان استام تۇرعىنىنا ساپالى مەديسينالىق قىزمەت كورسەتەتىن بولادى. جوبانىڭ جالپى قۇنى - 297 ملن تەڭگە.