قازاقستاندا ەگىن جيناۋ ناۋقانى باستالدى

ماماندار ەگىن جيناۋ ناۋقانى ۋاقتىلى باستاعانىن اتاپ ءوتتى. 

قازاقستانداعى ءداندى جانە ءداندى-بۇرشاقتى القاپتاردىڭ 49 %-دان استامى جينالدى، دەپ حابارلايدى Almaty-akshamy.kz.

مامانداردىڭ ايتۋىنشا، ەگىن جيناۋ جۇمىستارىن جۇرگىزۋ ءۇشىن رەسپۋبليكادا 141،7 مىڭ تراكتور، 73،5 مىڭ تراكتور تىركەمەسى، 36،9 مىڭ استىق جينايتىن كومباين، 12،8 مىڭ دەستەلەگىش بار.

ەگىن جيناۋ جۇمىستارىن ۋاقىتىلى جۇرگىزۋ ءۇشىن اۋىل شارۋاشىلىعى تاۋارىن وندىرۋشىلەر 396،5 مىڭ توننا جەڭىلدەتىلگەن ديزەل وتىنى ءبولىندى. ەنەرگەتيكا مينيسترلىگىمەن بىرلەسىپ، وبلىس وپەراتورلارىن مۇناي وڭدەيتىن زاۋىتتارعا(ءموز) بەكىتۋ كەستەسى بەكىتىلدى. وسى جىلدىڭ 2 قىركۇيەگىندەگى جاعداي بويىنشا كەستەگە سايكەس شىلدە-قازان ايلارىنا جوسپارلانعان 396،5 مىڭ توننانىڭ 173،4 مىڭ تونناسى (44%) تيەپ-جونەلتىلدى.

«اعىمداعى جىلى اۋىل شارۋاشىلىعى داقىلدارىنىڭ جالپى ەگىس الاڭى 23 ملن گا قۇرادى (بۇل 2020 جىلمەن سالىستىرعاندا 322 مىڭ گا ارتىق). ءداندى جانە ءداندى-بۇرشاقتى داقىلدار 16،1 ملن گا (ونىڭ ىشىندە بيداي – 12،9 ملن گا)، مايلى داقىلدار-3،1 ملن گا، كوكونىس جانە كارتوپ – 473،8 مىڭ گا، ماقتا-109،7 مىڭ گا، قانت قىزىلشاسى –21،7 مىڭ گا، جەمشوپ داقىلدارى-3،2 ملن گا القاپتا ورنالاستىرىلدى»،– دەلىنگەن اۋىل شارۋاشىلىعى مينيسترلىگىنىڭ باسپا ءسوز قىزمەتىنىڭ حابارلاماسىندا.

ماماندار بيىل ەگىن جيناۋ ناۋقانى ۋاقتىلى باستالعانىن جانە رەسپۋبليكا بويىنشا بارلىعى 7،9 ملن گا ءداندى جانە ءداندى-بۇرشاقتى داقىلدار نەمەسە جالپى جيناۋ الاڭىنىڭ 49،4% جينالعانىن ايتىپ وتىر.